Ka’aj máata’abe’, chéen wakp’éel u seemanasil yaan ti’ ka’achij, ba’ale’ u yaak’ Zoeye’ tu péeksaj u yóol u yuumil, máaxo’bo tu tukultajo’obe’, je’el bix u bin u nojochtale’ beey xan ku bin u chéen yéemel le beyka’aj nojochil u yila’alo’, ba’ale’ ma’ beey úuchij. Le beetik walkila’, chíimpolta’an yéetel Récord Guinness, tumen leti’e’ peek’ yaan u asab nojochil aak’ ichil tuláakal yóok’ol kaab.
Peek’e’ xa’ak’an u ch’i’ibal ichil labrador yéetel pastor alemán. U yaak’e’ ku p’isik 12.7 sentiimetróos u chowakil, ts’o’okole’ le je’elo’ maas chowak ti’ le ts’o’okili’ u yáax je’ets’el ka’acho’, tumen lelo’ chéen 9.49 sentiimetróos.
En español: Zoey y su Récord Guinness por ser el perro con la lengua más larga del mundo
Récord Guinnesse’ ku ya’alik Zoeye’ ti’ síij tu kaajil Luisiana, Estados Unidos, ts’o’okole’ maas jach táaj chíika’an le beyka’aj nojochilo’ kéen ts’o’okok u báaxal yéetel kéen káajak u jéesbal.
U yuumo’obe’, Sadie yéetel Drew Williams, ku ya’aliko’obe’ le xch’upul peek’a’ ya’ab u lúubul u k’aab u chi’, ts’o’okole’ kéen náats’ak wa máax yiknale’, yáax ba’ax ku ya’alal ti’e’, kéen ts’o’okok u ma’achale’ yaan u yu’ubik ch’uul u nook’.
Xak'alutskíinsa'an tumen: Sasil Sánchez Chan
