Boon tu beetaj yéetel le túumben nu’ukulo’obo’ tu ch’a’aj ti’ úuchben ts’íibo’ob, woojo’ob yéetel boono’ob yano’ob ka’ach ti’ ts’íibil tuunicho’ob, u nu’ukulilo’ob k’at, najo’ob yéetel kúuchilo’ob, ichil uláak’o’ob. Danny Oñatee’ juntúul díiseñadoor tu beetaj boono’ob k’ajóolta’an beey íiperrealiistáas tu’ux ku chíikpajal úuchben maaya áanalte’ob, ba’ale’ ti’al u béeytal u beetike’ ti’ k’a’abéetkunsaaj iintelijeensyáa artifisyaal.
Tu kúuchil Facebook ku k’aaba’tik La Historia de Amaruk, k’i’itbesa’ab tumen Oñate le jejeláas oochelo’oba’, tu’ux ku ye’esik bix ku tukultik chíikpaj maaya wíinik te’e úuchben k’inako’ob ka’ach mu’uk’a’an yanik u kaajili’.
Oñatee’ síij tu lu’umil Ecuador, ts’o’okole’ ti’al u beetike’ tu ch’a’aj oochelo’ob jts’a’ab ti’ úuchben nu’ukulo’ob je’el bix p’úulo’ob ti’al beyo’ “u ts’áak u yóolo’ob” yéetel u ye’esik óoli’ bix je’el u chíikpajalo’ob wa jach oochelo’ob.
En español: Recrean códices mayas usando inteligencia artificial: Fotos
Yéetel túun íintelijeensyáa artifisyaale, béeychaj u jeel bona’alo’ob, tumen le ba’al je’elo’ ku meyaj kéen a wa’al ti’ ba’ax kéen u beetej, tumen súuperfisyaal le ba’ax ku jóok’siko’, le beetike’ ku jelbesik wa ku luk’sik jayp’éel ba’alo’ob yaan ti’ le nu’ukulobo’.
Yóok’lal túun le je’elo’, le máax beet le meyajo’ tu sáasilkunsaj ti’ oochelo’ob tu jóok’saje’ yaan jayp’éel ba’alob ma’ jach patalo’obi’.
“Sáasilkuunaj: oochelo’ob ku ye’esa’ala’ chéen jayp’éel ba’alo’ob jóok’sab ti’ uláak’ úuch yanako’ob, ba’ale’ yaan ya’abach ba’alo’ob ma’ pataltako’obi’; kex beyo’ ku chan ts’áako’ob jump’íit sáasil ti’ bix le maayaob ka’achij”, tu ts’íibtaj.
Ichil uláak’ ba’alobe’ Dannye’ ku k’i’itbesik uláak’ ba’ax ku meyajtik yéetel íintelijeensyáa artifisyaal yóok’lal andino kaaj wa bix u tukultik u yich uláak’ máak kuxlaj ti’ yaanal miatsilo’ob.
Danny Oñatee’ ku meyajtik jejeláas ba’alo’ob yaan ba’al u yil yéetel u yutskíinsa’al u ba’alumbáaj wa u nu’ukulo’ob kaaj yéetel miatsilo’ob, tu’ux xan ts’o’ok u jach kanik bix u beeta’al yéetel bix u meyajta’al jejeláas ba’alob ti’al u cha’antal, wa u yu’ubal.
Xak'alutskíinsa'an tumen: Sasil Sánchez Chan
