Te’e k’iino’ob jmáana’ k’a’ayta’ab Segunda Edición del Festival Sabores de Yucatán, yaan u beeta’al ichil u k’iinil 16 tak 20 ti’ noviembre ti’ le noj lu’umo’.
Michelle Fridman Hirsch, máax jo’olbesik Secretaría de Fomento Turístico (Sefotur) tu lu’umil Yucatán, tu ya’alaj te’e ja’aba’ yaan u beeta’al kamp’éel noj ebeentóos chéen ti’ jump’éel, tumen ti’ le meyaj k’a’ayta’abo’, táakbesa’an xan Barra México, Concurso Mundial de Bruselas —yáax juntéen u beeta’al ti’ jump’éel péetlu’um tu’ux ma’ tu meyata’al binóo—, Best Chefs Awards —yáax juntéen u beeta’al táanxel tu’ux ti’ Europa—, yéetel le ku kaxta’al u ye’esa’al ba’ax mixolojyáa yéetel biinóos.
Tu k’a’ajsa’aje’, ka’aj yáax beeta’ab u cha’anil Festival de Sabores de Yucatán k’ama’ab maanal 12 mil u túul máak, 58 próoduktorées, yanchaj 19 táayeres yéetel 10 u p’éel tsikbalo’ob beyxan tse’eko’ob.
En español: Festival Sabores de Yucatán serán cuatro eventos en uno: Conoce más aquí
Te’e súutuk beeta’ab le k’a’aytajilo’, tsikbalta’ab xan uláak’ ba’alo’ob yóok’lal kaajo’ob túumben chíimpolta’anob beey Pueblos Mágicos, tu’ux yaan Espita, Motul yéetel Tekax; tu ya’alaje’ u k’aaba’inta’alob beyo’ ku taasik uláak’ ba’alo’ob je’el bix wu’ulabo’ob, ba’ale’ beyxan u yantal u beeta’al u jeel meyajo’ob wa nu’ubkesajo’ob.
Baudoin Havaux, máax jo’olbesik u keetil Concurso Mundial de Bruselas, tu ya’alaje’ u tuukulil le meyaja’, leti’ u kaláanta’al ka ts’aatáanta’ak u túunta’al u jach ma’alobil biinóo, ti’al xan u bin u k’ajóolta’al uláak’ ba’alo’ob yóok’lal.
Tu ya’alaje’, yéeya’ab Yucatán ti’al u beeta’al tumen k’a’abéet ka yanak máako’ob u kan u túunt le ba’alo’oba’. U 90 por sientoil biinóo ku yu’uk’ule’ ku beeta’al kéen janak máak, ts’o’okole’ lela’, yáax juntéen u beeta’al ichil cha’an tu’ux ku ch’a’abal janal beey u nooyil.
Carlos Borboa, máax jo’olbesik u jaatsil Latinoamérica y Norteamérica ti’ le keetilo’ , tu ya’alaje’ Concurso Mundial de Bruselas “chéen u t’aanil ti’al u k’ajóolta’al le noj lu’umo’”.
Xak'alutskíinsa'an tumen: Sasil Sánchez Chan
