Ka’ap’éel t’aan ich zoque t’aan: Matza yéetel Najsakopajk, leti’e’ túumben k’aaba’ jts’a’ab ti’ jump’éel eek’ yéetel jump’éel éexoplanetáa yaan ti’ u ka’anil Centauro, tumen u noj lu’umil Méxicoe’ béeychaj u máan tu jach táanil ichil jump’éel ketlam beeta’aab yéetel uláak’ táanxel lu’umo’ob, ti’al u yéeya’al ba’ax k’aaba’il kun ts’a’abil ti’ le eek’o’oba’.
U múuch’kabil Unión Astronómica Internacional (IAU, yóok’lal bix u k’aaba’ ich inglés t’aane’) tu k’a’aytaj máaxo’ob náajalt u cha’abal u ts’áako’ob u k’aaba’ 20 u p’éel eek’o’ob yéetel le uláak’ bak’pactiko’obo’.
En español: México gana concurso para nombrar estrella y exoplaneta en lengua zoque
Ti’ le 91 u p’éel noj lu’umo’ob táakpaje’, Méxicoe’ béeychaj u náajali’, le beetike’ leti’ ts’áaj u k’aaba’ jump’éel eek’ yaan tu ka’anil Centauro, yéetel uláak’ bak’pachtik.
Beey túuno’, walkila’ te’e ka’ano’, táan u jojopáankil Matza, u k’áat u ya’al eek’ ich zoque t’aan, yéetel Najsakopajk, u k’áat u ya’al Madre Tierra.
Ichil ba’ax jts’a’ab k’ajóoltbil tumen IAU, u k’aaba’ le t’aano’ob ku yu’ubal tu kaajil Chiapase’, yaan ba’al u yil yéetel u yutsil yantal ba’al, ich jets’ óolal yéetel ki’iki’ óol, beyxan yéetel bix u na’atal kuxtal tumen le miatsilo’.
Xak'alutskíinsa'an tumen: Sasil Sánchez Chan
