Ti’ le winal yaniko’ona’, u noj lu’umil Australiae’ tu éejentaj u béeytal u k’a’abéetkunsa’al eextasíis yéetel waya’as kuuxum ti’al u ts’a’akal jayp’éel k’oja’anilo’ob ku tsa’ayal tu tuukul wíinik. Le je’ela’, jump’éel ti’ le yáax lu’umo’ob táan u éejentiko’ob u yúuchul ts’aakáankil yéetel le ba’alo’oba’.
Ti’al u winal febrero, ti’ le noj lu’umo’, mola’ay ts’áak u p’iisil u k’a’abéetkunsa’al droogase’, tu p’ataj beey legaltako’ob, le beetike’, tu yáax k’iinil julioe’ eextasíis yéetel silocibinae’ yaan xan u páajtal u túuxta’al luk’bil beey ts’aake’ tumen sikiaatráas ti’al u ts’a’akal ba’ax k’aaba’inta’an beey trastorno de estrés postraumático yéetel jayp’éel u jejeláasil yajil luubul óol.
Tu lu’umil Canadá yéetel Estados Unidose’ cha’aban u k’a’abéetkunsa’al tu ka’ap’éelil le ba’alo’oba’, kéen jo’op’ok u beeta’al éensayos ti’al u ts’a’akal máak, wa kéen yanak kaasóos tu’ux jach k’a’abéet wa unaj u k’a’abéetkunsa’al.
Tu winalil febrero túune’, Australiae’ tu jeel jatsaj ba’ax yaan ichil le ka’ap’éel kuuxumo’, tu jo’oloj beeta’ak le éensayoso’ tumen Agencia de Productos Terapéuticos, tu’ux a’alabe’ le ba’ax meyajta’abo’ tu chíikbesaj le ba’alo’obo’ “óol utstak ti’al ts’aak” wa “ku kaláanta’al bix u k’a’abéetkunsa’al”.
Mike Musker, juntúul ajxak’al xook jach kaambanaja’an yóok’lal k’oja’anilo’ob ku tsa’ayal ti’ u tuukul wíinik tu noj najil xook Universidad South Australia, tu tsikbaltaj ti’ Afpe’, MDMA (eextasíise’) je’el u yáantaj ti’al u ts’a’akal ba’ax yaan u yil yéetel estrés postraumático yéetel silocibina je’el u yáantaj ti’al u máan yajil luubul óol.
En español: Australia avala uso médico de éxtasis y hongos alucinógenos
Xak'alutskíinsa'an tumen: Sasil Sánchez Chan
 23_01_31.png)
