Ti’al u chíimpolta’al meyaj ku beeta’al ti’al u chíikbesa’al chíikulalo’ob e’esik miatsil yaan tu noj lu’umil México, ajpat a’almajt’aano’ob ku meyajo’ob tu múuch’il Comisión de Gobernación y Población jumpáak úuchik u éejentiko’ob ka je’ets’ek u k’iinil 19 ti’ marzo beey u k’iinil ti’al u chíimpolta’al ajmeyaj k’abo’ob, Día de la Artesana y el Artesano.
Jets’ t’aan beeta’abe’ ku chíimpoltik ko’olel yéetel xiib meyajtiko’ob jejeláas ba’al yéetel u k’abo’ob, tumen le je’elo’ k’a’anan ti’al u béeytal u yantal náajal taak’in te’e baantaa’, yéetel ti’ kaajo’ob tu’ux ya’abach u kóojol máak xíinximbali’, tu’ux xan ku péektsilta’al miatsil yéetel ba’ax suuk u beeta’al tu kaajilo’ob u noj lu’umil México.
Yéetel le je’ela’, ajpat a’almajt’aano’obe’ táan u kaxtiko’ob ka káajak u je’ets’el a’almajt’aano’ob yéetel noj meyajo’ob ti’al u yutsil máaxo’ob beetik le meyajo’obo’, u ya’abile’ leti’e’ yaan ba’al u yil ti’al u kaláanta’al u meyajo’ob, je’el bix a’almajt’aano’ob ti’al ma’ u jóok’sa’al u yoochelo’ob wa u beeta’al uláak’o’ob óoli’ je’ex le ku beetiko’ob leti’obo’.
Ajpat a’almajt’aano’obe’ tu ya’alajo’obe’ u je’ets’el le k’iina’, ku ts’áak u páajtalil u yantal uláak’ a’almajt’aano’ob ti’al u chíimpota’al máaxo’ob beetik meyaj k’abo’ob, je’el bix xan ti’al u ts’a’abal áantaj k’a’abéet ti’ob.
En español: Aprueban que el 19 de marzo sea del Día de la Artesana y el Artesano
Xak'alutskíinsa'an tumen: Sasil Sánchez Chan
