Máax jbeet u koonsulil Alemania tu noj lu’umil México, Rudolf Bittorf, tu k’ubaj ti’ u kúuchil Museo Maya de Cancún, u yoochel jump’éel kanyon meyajnaj sigloo XVII, jch’a’ab ti’ u xéexet’ cheem tu ja’abil 1958, tu ja’il Bahía de Isla Mujeres.
K’uubajile’ beeta’ab tu yáax k’iinil junio ti’ u ja’abil 2023. Te’e súutuk ka’aj k’uba’ab nu’ukule’, Bittorfe’ tu tsikbaltaj tu paalil ka tu yilaj jach uts tu yich ba’alo’ob beyo’. Síij tu lu’umil Brasil, tu’ux káaj xan u k’ajóoltbil tu’ux ti’ u k’áak’náabil Indias jmáan cheemo’ob yéetel portuguesil máako’ob k’uch u xak’alto’ob sudamerikanoil lu’umo’ob, tu k’iinilo’ob Colonia.
En español: Recibe el Museo Maya de Cancún la exposición Water for Life
U jach jaajil kanyon tu k’ubaje’, ti’ p’aatal tu najil xook Escuela Secundaria Técnica No. 1, tu kaajil Isla Mujeres, tu’ux ku béeytal u cha’anta’al. Jump’éel Falcon, óoxp’éel liibráas u aalil. Ts’o’okole’ jump’éel ti’ le asab úuchbentak kaxta’an tu lu’umil América. Ka’aj k’a’abéetkunsa’abe’, meyajnaj ti’ jump’éel cheem ti’alinta’an tumen Estados Unidos.
Xak'alutskíinsa'an tumen: Sasil Sánchez Chan
