U mola’ayil Instituto Mexicano del Seguro Social (IMSS) tu péetlu’umil Yucatán tu ts’áaj k’ajóoltbile’ ti’ le winalo’ob ku taala’, yaan u k’a’abéetkunsik óoli’ 150 miyoonesil pesos ti’al u yutskíinsa’al u kúuchilo’ob Unidades de Medicina Familiar yéetel najilko’ob ts’akyaj, ti’al u mu’uk’unsa’al bix u ts’aatáanta’al kaaj.
Taak’in kun ts’a’abal u ti’ale’ yaan u meyaj ti’al u ka’a beeta’al u jaatsilo’ob Hospitalización, Urgencias, kiroofanóos, u jaatsil Tococirugía, Salas de Expulsión, je’el bix xan u ya’abil aires áakondisyóonados ti’ u kúuchilo’ob Hospitales Generales Regionales (HGR) No. 12 Lic. Benito Juárez García, No. 1. Lic. Ignacio García Téllez yéetel Unidad Médica de Atención Ambulatoria (UMAA), tu noj kaajil Jo’.
Beey túuno’, yaan xan u táakbesa’al óoxp’éel kúuchilo’ob yaan tu kaajilo’ob Motul, Umán yéetel Tizimín, ti’al xan u túumbenkunsa’al ba’alo’obi’.
Ichil ba’ax yaan u yil yéetel Primer Nivel de Atención, meyajo’obe’ yaan u beeta’al ti’ 19 Unidades de Medicina Familiar (UMF) tu’ux yaan ichil jump’éel tak bolonp’éel kóonsultoryóos, ikil táan u beeta’al u nu’ukbesajil Programa Nacional de Dignificación de UMF, ti’al u k’e’exel, u ma’alobkúunsa’al yéetel u túumbekunsa’al kúuchilo’ob.
En español: IMSS Yucatán invertirá cerca de 150 mdp para mejorar hospitales
Uláak’ ba’ax kun meyajtbile’ leti’e’ Almacén General Institucional, tu’ux ku líik’sa’al yéetel tu’ux ku t’o’oxol ts’aako’ob ti’al máaxo’ob ku bino’ob te’e kúuchilo’obo’.
K’a’anan u ya’alale’, IMSS tu lu’umil Yucatáne’, ikil u meyaj u kúuchil Subdelegación Mérida Norte, náajalta’ab Premio IMSS a la Competitividad, le beetike’, yaan u ts’a’abal uláak’ taak’in ti’al xan u k’a’axel le kúuchilo’.
Máax jo’olbesik IMSS tu péetlu’umil Yucatán, Alonso Juan Sansores Río, tu ya’alaje’ meyaj kun beetbile’ ku chíikbesik u yóol yaan ti’al u yutsil meyaj kúuchilo’ob tu’ux ku ts’aatáanta’al kajnáalo’ob.
Xak'alutskíinsa'an tumen: Sasil Sánchez Chan
