Te’e k’iino’oba jmáana’, sábado yéetel domingo, tu kaajil Tahmek, Yucatán, beeta’ab cha’an tu’ux líik’sa’ab gloobos ku meyajta’al tumen le kaajo’. Le je’ela’ u yóoxtéenil u beeta’al, ts’o’okole’ te’e ja’aba’, táakpaj ajmeyaj k’abo’ob ti’ u lu’umilo’ob Brasil yéetel Colombia, ba’ale’ beyxan yaan uláak’ taalo’ob ti’ u kaajil Estado de México, Hidalgo, Michoacán, Morelos yéetel Veracruz.
Tu súutukil úuchik u káajal cha’ane’, táakpaj Loreto Villanueva Trujillo,máax jo’olbesik u mola’ayil Secretaría de la Cultura y las Artes de Yucatán, beyxan u jo’olpóopil Tahmek, Neyda María Heredia Leal, ichil uláak’o’ob.
En español: Inauguran el Festival del Globo Maya en Tahmek
Beey túuno’, te’e áak’ab káajo’, na’aksa’ab gloobos beeta’ab te’e kaajo’, ts’o’okole’ tsola’ab yaan ya’abach ba’al u yil kéen jo’op’ok u beeta’al yéetel u na’aksa’al, je’el bix u nu’uktal iik’ ti’al u béeytal u na’akal tu beel, u chúukbesa’al chokoj iik’ ichil ti’al u líik’il; tsola’ab xane’ yaan gloobose’ ku p’isik tak 12 metros u ka’analil yéetel yaan uláak’o’obe’ ku t’i’inil u jeel ba’alo’ob, je’el bix fueegos piroteeknikóos.
Tu’ux beeta’ab cha’ane’, yanchaj xan u t’o’ol cha’an tu’ux tsola’ab uláak’ ajmeyaj k’abo’ob ti’ u jeel kaajo’ob, je’el bix Hocabá, máaxo’ob tu biinsajo’ob jejeláas nu’ukulo’ob ti’al u konko’ob, je’ex ba’alo’ob beeta’an yéetel sóoskil, nook’, kaab, ichil ukáak’ ba’alo’ob. Cha’ane’, ts’o’ok tu k’iinil domingo áak’ab.
Xak'alutskíinsa'an tumen: Sasil Sánchez Chan
