Ichil jump’éel chan máaben muka’ane’ tu baantail tu’ux yaan u yúuchben kúuchil Templo Mayore’, kaxta’ab 15 nu’ukulo’ob yaan u wíinkilal óoli’ je’ex wíinike’, meyajta’an yéetel ya’ax tuunich. Le je’ela’ u ye’esajil ba’ax k’uba’ab ti’ mexicas ka’aj palitsilta’abo’ob tu xamanil Guerrero.
K’uubajile’ yanchaj tu k’iinilo’ob kuxlaj Moctezuma Ilhuicamina, máax tu beetaj u jala’achil ichil 1440 yéetel 1469 ti’ u jats k’iinilo’ob Nuestra Era. Ichil le máabeno’, kaxta’ab xan kooncháas yéetel juubo’ob, je’el bix xan tuupo’ob yaan u foormail tsáab kaan, yéetel mejen ya’ax wóoliso’ob.
En español: Encuentran ofrenda de 15 esculturas sepultadas en el Templo Mayor
Le úuchben nu’ukulo’obo’, kaxta’ab tumen u ajmeyajilo’ob Instituto Nacional de Antropología e Historia (INAH) máax táakano’ob tu nu’ukbesajil Proyecto del Templo Mayor, tu noj kaajil Ciudad de México.
K’uubajilo’ob je’el bix le je’ela’, suukchaj u mu’ukul ti’ tuunich máabeno’ob tu bak’pachil Templo Mayor, ts’o’okole’ k’ajóolta’an beey tepetlacalli, ich náhuatl t’aan; u k’áat u ya’alej: tetl, tuunich yéetel petlacalli, u máabenil poop.
Xak'alutskíinsa'an tumen: Sasil Sánchez Chan
