U chokolil ja’ yaan tu k’áak’náabil u noojolil Florida k’uch tu chokolil je’ex jacuzzis, tumen tu píitmáansaj 100 gradóos (37.8 gradóos Celsius) tu jo’oloj ka’ap’éel k’iin. Méeteorologose’ ku ya’aliko’obe’ míin leti’ u asab chokoj ja’il k’áak’náab ts’o’ok u yáax yantal, kex tumen yaan jayp’éel ba’alo’ob ma’ jach uts u na’atal walkila’.
Tu náachil 40 kiloometrose’, ajxak’al xooko’obe’ béeychaj u yilko’ob ba’axo’ob talamil wa k’aasil ku yantal ikil u seen chokojtal ja’ bak’pachtik Florida: ku saktal koorales yéetel yaan jayp’éel ti’ le táakano’ob ka’ach Cayos de Floridae’, kíimo’ob. Le bix u k’éexel yóok’ol kaab tu winalil julioe’ tu beetaj u yáax p’i’isil reekords mix juntéen yáax yanak.
En español: La temperatura del agua en el extremo sur de Florida alcanza nivel de un jacuzzi
Kex beto’, máaxo’ob p’isik u chokolil yóok’ol kaab yéetel u chokolil k’áak’náabe’ tu ya’aljo’ob ma’ óofisyáal p’iis tu beetajo’obi’, ba’ale’ yáax ba’ax xoka’ab ti’ jump’éel u booyail Manatee Bay k’uch tak 101.1 gradóos (38.4 grados Celsius) tu winalil julio, beey a’alab tumen George Rizzuto, máax ku meyaj tu mola’ayil Servicio Nacional de Meteorología. Ts’o’okole’ tu jo’oloj jayp’éel k’iino’obe’, le booyáa je’elo’ tu chíikbesaj 100.2 graadóos (37.9 Celsius).
Kex tumen ma’ óofisyaal rejiistros beta’an yóok’lal u chokolil ja’e’, tu ja’abil 2020e’ beeta’ab jump’éel xaak’al tu’ux ts’íibta’abe’ u ja’il Kuwaite’ k’uch tak 99.7 gradóos (37.6 Celsius) tu winalil julio ti’ u ja’abil 2020, te’e k’inake’ leti’e’ asab chokoj ja’il ojéelta’ab yanchaj ichil tuláakal yóok’ol kaab.
Xak'alutskíinsa'an tumen: Sasil Sánchez Chan
