Junmúuch’ argentinoil páaleontologóose’ tu kaxtaj u baakel u pool jump’éel túumben jejeláasil anuro, juntúul ba’alche’ kuxtal tu jats k’iinil Pleistoceno ti’ le lu’umil je’elo’, beey jts’a’ab k’ajóoltbil tumen Museo Paleontológico de San Pedro.
U múuch’il Grupo Conservacionista de Fósiles ti’ le kúuchill e’esajil yaan tu noj kaajil San Pedro, tu lu’umil Buenos Airese’, tu kaxtaj le úuchben ba’alche’ tukulta’an kuxtal walkil 100 mil ja’abo’ob paachil.
En español: Hallan cráneo de nueva especie de anfibio prehistórico en Argentina
Úuchik u kaxta’al nonoj u baakel u pool le ba’alche’a’, béeychaj u ke’etel yéetel uláak’ úuchben baako’ob láayli’ ti’ le ba’alche’ob, le beetik páajchaj u ya’alale’ “Juntúul ba’alche’ mix juntéen yáax ila’ak”. Jump’éel túumben jejeláasil ba’alche’ suuka’an ka’ach u ts’onik je’el ba’axak ka máanak tu táan”, tsola’ab ti’ k’aa’ytajil beeta’ab.
Beyxan yéetele’, ku béeytal u na’ata’al bix u jejeláasil ba’alche’ob te’e k’inako’obe’, yéetel bix úuchik u bin u k’éexelo’ob. Páatchaj xan u jeel tukulta’al uláak’ ba’alo’ob ti’ bix úuchik u ch’éejel ba’alche’ob tu k’iinil ka’aj yanchaj u ts’ook glasiasyoon tumen tu jelbesaj kuxtal nukuch ba’alob yaan ka’achij, ba’ale’ beyxan uláak’o’ob je’el bix muucho’ob.
Xak'alutskíinsa'an tumen: Sasil Sánchez Chan
