Múuch’kabil ku meyaj ti’al u yutsil kaaj, SOLYLUNA, a.c., ikil táan u múul meyaj yéetel u nu’ukbesajil Programa Cliente Oxxo tu beetajo’ob k’a’aytajil tsikbal tu’ux tu a’alabe’ táan u káajal jun jaats k’iino’ob meyaj ti’ ba’ax k’ajóolta’an beey réedondeo, káaj tu yáax k’iinil octubre máaniko’, yéetel yaan u ts’o’okol tak tu winalil diciembre, ti’al u yutsil paalal, ba’ale’ beyxan táankelemo’ob máaxo’ob yaan ti’ob, ba’ax k’ajóolta’an dibersidaad funsyoonal, wa le ku ya’al díiskapasidad. Taak’in kun molbile’, leti’e’ kun ts’áabil tumen kaaj tu Oxxosil Progreso, Saki’, Tízimin yéetel le yano’ob tu noojolil u kaajil Jo’.
Taak’in kun much’bile’ yaan u k’a’abéetkunsa’al ti’al u yutskíinsa’al ka’ap’éel k’óoben, yéetel ka’ap’éel soolaro’ob. Kéen béeyak le je’elo’, u paalilo’ob SOLYLUNAe’ yaan u béeytal u pak’iko’on jejeláas janabe’enba’alo’ob, yéetel u kanik u chako’ob jayp’éel janalo’ob ti’al u tséentikubáajo’ob.
Beyxan, taak’in kun much’bile’ yaan u k’a’abéetkunsa’al ti’al u ma’anal nu’ukulo’ob je’el u yáantajo’ob ti’al u ka’ansa’al u péeksik u chi’, u kama’ach, u yaak’ yéetel u kaal meken paalal, ti’al beyo’ u béeytal u tséentikubáaj tu juuno’ob, yéetel ti’al u káajal u t’aan le paalalo’obo’.
Úuchben tuukulo’obe’, ku ya’aliko’ob díiskapasidaade’ ku na’ata’al beey ba’alo’ob ku binetik wa ma’ tu páajtal u beeta’al tumen wa máax, je’el ba’axak bíin yanak u yil yéetel u tuukul máak, u na’at, u wíinkilal, wa je’el ba’axak ka u talamkúuns u beettik u kuxtal máak chéen je’ex suuka’anile’. Ka’ache’ ku tukulta’ale’ chéen u talamil juntúul wíinik, ba’ale’ tu jo’oloj péektsilta’al ya’abach ba’alo’ob tumen máaxo’ob yaan ti’ jump’éel díiskapasidaade’ káaj u chíimpolta’al u páajtalil le máaxo’ob beyo’obo’, ts’o’oke’ káaj xan u jelpajal tuukulo’ob yaan u kuuch tu yóok’olo’ob; le beetik káaj u ya’alal ti’ dibersidaad funsyoonal. U nooyil le tuukula’ leti’ le je’ela’: ma’ wíinik ma’ tu tsa’ayal u beet wa ba’axi’, chéen jejeláas bixij.
Ichil ba’ax jets’a’an tumen Encuesta Nacional sobre Discriminación 2022 (ENADIS 2022), péech’óolal ku yantal yóok’ol máaxo’ob yaan ti’ob wa ba’ax yóok’lal dibersidaad funsyoonale’ ku chíikpajal tumen ku ja’atsalo’ob, ku ts’a’abal u kuucho’ob wa ku je’ets’el ba’alo’ob tu yóok’olo’ob kex tumen ma’ beyi’. Ts’o’oke’ u 33.5% máaxo’ob k’áatchibta’al yaan 12 u ja’abil wa maanal ti’e’, ku tukultike’ ma’ táan u jach chíimpolta’al u páajtalilo’obi’. Yéetel u 65.8% kaaj yaan 12 años wa maanal ti’ yéetel yaan díiskapasidaade’ tu jets’aje’ ya’abach ti’ leti’obe’ ma’ tu chíimpolta’alo’ob tumen u ya’abil kaaj.
En español: SOLYLUNA y Oxxo se unen en campaña para ayudar a niños y jóvenes con diversidad funcional
Xak'alutskíinsa'an tumen: Sasil Sánchez Chan
.jpg)
