Le bix táan u bin u k’éexel lu’um ichil tuláakal yóok’ol kaabe’, yaan ba’al u yil yéetel u ch’éejel xan anfibios, beey a’alab ti’ xaak’al jts’a’ab k’ajóoltbil tu pikil ju’unil Nature.
Ba’alche’ob je’el bix muucho’ob yéetel kaano’ob, ichil uláak’o’ob jets’a’an beey de síis u k’íik’elo’obe’, ku béeytal u kuxtalo’ob ich ja’ ba’ale’ beyxan ti’ lu’um, ba’ale’ jach séeba’an u yu’ubiko’ob k’eexilo’ob ku yantal ti’ yóok’ol kaab, tumen mina’an u k’u’uk’melo’ob, mix tso’otso’ob wa eskaamáas ti’al u yáax k’a’amal ba’ax ku yu’ubiko’ob.
En español: Casi la mitad de los anfibios está en amenaza de extinción, según nuevo informe
Sáalamdras yéetel trituruse’ leti’e’ ba’alche’ob maas toopolo’ob tu yóok’lal, ts’o’okole’ u jach sajbe’entsile’ ti’al ba’alche’ob kaja’an tu petenilo’ob Caribe, Mesoamérica, yéetel tu’ux ku beetik ooxol tu k’áaxil Andes, Madagascar yéetel Sri Lanka, ichil uláak’ lu’umo’ob.
Tu jach táaj ku beetik ooxol, yaan ba’al u yil yéetel u k’éexel yóok’ol kaabe’, le jaatsil ba’alche’obo’ séeba’an u lúubul u yóolo’ob, ts’o’oke’ p’áat mina’an úumedad k’a’abéet ti’al u ts’áak u mejenil.
“Yaan k’iine’ ya’abach ti’ le k’eexilo’obo’ jach séeba’an u yúuchulo’ob, le beetik ma’ tu yantal mix u k’iinil u na’ata’al tumen le ba’alche’obo’”, tu ya’alaj Kelsey Neam, máax táaka’an tu múuch’il Grupo de Especialistas en Anfibios de la Comisión para la Supervivencia de las Especies de Unión Internacional para la Conservación en la Naturaleza (IUCN).
Xak'alutskíinsa'an tumen: Sasil Sánchez Chan
