Óoxp’éel k’iin kun múuch’ul tsikbal ajxak’al xooko’ob, ajkaambalo’ob yéetel kaajnáalo’ob yóok’lal jejeláas ba’al yaan u yil yéetel ooch, ikil táan Primer Congreso Nacional de Marsupiales Americanos. Meyaje’ káajsa’ab le martes 17 ti’ octubre máanika, yéetel yaan u ts’o’okol tu k’iinil 19’, tu kúuchil Centro Cultural Universitario, ti’ u noj najil xook UADY.
Yéetel meyaje’ táan u kaxta’al u tsikbalta’al yéetel u ye’esa’al ba’ax ojéela’an yóok’lal chan ba’alche’ ya’abach juntéenak séeba’an u kíiinsa’al, ba’ale’ leti’e’ k’a’anan ti’al kuxtal yaan yóok’ol kaab.
En español: Inaugura UADY el Primer Congreso Nacional de Marsupiales Americanos
Jxak’al xook Hugo A. Ruiz Piña, juntúul ti’ máaxo’ob káajs xaak’al yóok’lal marsupiales tu petenil Yucatáne’, leti’ máax jo’olbesik u beeta’al le múuch’a’. Tu ya’alaje’, ma’ na’ata’ak u k’a’ananil ooch, ts’o’oke’ yéetel ba’ax táan u beeta’al te’e múuch’tambala’, leti’ u tso’olol ba’ax ojéela’an yóok’lal.
“Ooche’ juntúul ba’alche’ tuláakal máak k-k’ajóolmajil, tuláakalo’on k-ilik, ba’ale’ ya’abach u kíinsa’al. Le bix u yila’ale’ míin ma’ patali’, ts’o’oke’ ma’ táan kchíimpoltik u k’a’ananil, tumen leti’ ts’áak u p’iis ik’elo’ob wa ba’alche’ob ku máano’ob muul. Le beetike’, múuch’tambale’ táan u beeta’al ti’al u yojéelta’al uláak’ ba’alo’ob tu yóok’lal yéetel ti’al u yojéeltik máak ba’ax kéen u beet kéen u yilej. K’a’abéet kna’atike’ ma’ chéen to’on kuxa’an wey lu’ume’, yéetel ma’ xan chéen to’on u jach k’a’ananil kuxtal”, tu ya’alaj Ruiz Piña.
Xak'alutskíinsa'an tumen: Sasil Sánchez Chan
