Palestinail xts’íib Heba Abu Nada jkíim yóok’lal seen wa’awak’ajil táan u yantal tumen israelíil muuk’, beey úuchik u ts’a’abal k’ajóoltbil le domingo máanika’, ti’ k’a’aytajil beeta’ab tumen u mola’ayil Al Mayadeen.
32 u ja’abil ka’ach palestinail xk’aay tuukul, Heba Abu Nada. Ti’ jlúubsa’ab tu kaajil Khan Yunis.
U Ministerioil Cultura tu kaajil Líbanoe’ tu jets’aj jaaj jkíim le xts’íibo’, yóok’lal ba’ateltáambal yaan tu xuul kajil Gaza.
Wakp’éel ja’abo’ob paachile’, xk’aay tuukule’, tu náajaltaj u ka’a kúuchil ichil u ketlamil Premio Sharjah a la Creatividad Árabe úuchik u beetik u ts’íibil El oxígeno no es para los muertos.
En español: Heba Abu Nada, poeta palestina, fallece tras bombardeo en Gaza
Síij tu ja’abil 1991, tu kaajil La Meca. Ka’aj líik’e’ suukchaj u yu’ubik bix úuchik u péek u baatsil ti’al u wulatkubáaj táanxel tu’ux, úuchik u yúuchul ba’ax k’ajóolta’ab beey Nakba, tumen ka’aj úuche’, yanchaj u jóoks’a’al palestinoil kaaj úuchik u multa’al tumen Israel tu ja’abil 1948, beey k’a’ajsa’abik tumen Al Mayadeen.
Heba Abu Nada tu ts’o’oksaj u xookil Bioquímica tu noj najil xook Universidad Islámica de Gaza, meyajnaj beey xka’ansaje’, yéetel tu ts’o’oksaj u maestriail nutrición clínica.
Le jueves máaniko’, tu ts’íibtaj: “Wa jkíimo’one’, k-ojele’ ki’imak k-óol ts’o’oke’ wa’alakbalo’ob, yéetel ti’ k-k’aaba’e’ k-a’alik jach wíiniko’on… Oh, in ki’ichkelem Yuum, Heba”.
Xak'alutskíinsa'an tumen: Sasil Sánchez Chan
