U jala’achil u noj lu’ume’ tu k’a’aytaj táan u náats’al u k’iinil u káajal Feria Yucatán Xmatkuil 2023, jump’éel ti’ le k’a’anan cha’ano’ob ku yantal tu noojol-lak’inil México. Le je’ela’ yaan u káajal 10 ti’ noviembre yéetel yaan u ts’o’okol le 3 ti’ diciembre ku taalo’.
K’a’aytabe’ yaan u yantal maanal 3 mil jejeláas ba’alo’ob ti’al náaysaj óol, ichil le je’elo’obo’ ti’ yaan, yáax juntéen ts’o’oke’ xma’ bo’olile’ Banda MS; Las perdidas con Wendy Guevara, Paolita Suarez yéetel Kimberly Irene “La más preciosa”; beyxan náaysaj óol yéetel Team Infierno; yaan xan u táakpajal Vanessa Huppenkothen, Fernando Palomo yéetel Roberta Rodríguez. Ts’o’oke’ ma’ tu páajtal u p’áatal mina’an noj Vaqueríai’.
En español: Feria Xmatkuil 2023: Conoce la cartelera de eventos
Yaan u táakpajal maanal mil 400 u túul máako’ob kun e’esik jejeláas bsa’alo’ob, yéetel yaan xan u k’iinil tu’ux kun ts’o’oksa’aal u beel ya’abach núupo’ob kéen u yóoto’ob ka úuchuk beyo’.
Beey túuno’, yaan u beeta’al XXIX Feria Internacional de Ganadería Tropical, XXV Exposición de Ganado Brahman yéetel XVII Exposición Regional Ovina, ichil uláak’ ba’alo’ob ti’al u táakmuk’ta’al meyaj ku beeta’al ti’al u máaxo’ob tséentik waxak te’e péetlu’umila’.
Máaxo’ob kun bine’ yaan u béeytal u cha’antiko’ob Varietté Cirque, uláak’ jump’éel siirkóo yéetel túumben e’esajilo’ob, je’el bix Circo de los Miedos, tumen lelo’ yáax juntéen u k’ujsa’al Xmatkuil.
Le beetike’, u jala’achil u noj lu’umil Yucatáne’, ku páayt’antik kajnáalo’obe’ ti’al ka u nats’ubáajo’ob cha’an yéetel u náays u yóolo’ob tumen beyo’ ku táakmuk’ta’al xan meyaj ku beeta’al ti’al u yantal náajal te’e noj lu’umo’.
Xak'alutskíinsa'an tumen: Sasil Sánchez Chan
