U mola’ayil Economía tu kaajil Tulume’ táan u páayt’antik máaxo’ob ti’ yaan jump’éel komeersyóoe’ ti’al u k’a’abéetkunsiko’ob deskuento táan u beeta’al yóok’ol u 90 por sientoil ti’al u béeytal u ts’íibta’al maarkas tu táan Instituto Mexicano de Propiedad Industrial (IMPI).
Bady Gómez Soberano, máax jo’olbesik Economía tu kaajil Tulume’, tu ts’áaj k’ajóoltbile’ le je’ela’ jump’éel nu’ukbesaj ku k’aaba’tik “La importancia del registro de marca”.
Beey túuno’, tu k’a’ajsaje’, jayp’éel winalo’ob paachile’, beeta’ab u yáax káampanyail, ts’o’oke’ jach ma’alob úuchik u k’a’amal tumen maanal 30 u túul máako’ob, ichil jkoonolo’ob, jmeyaj k’abo’ob, ichil uláka’o’ob, tu táakbesubáajo’obi’.
Le je’el túuna’, táan u beeta’al ti’al u ch’a’ajolta’al yáax meyaj beeta’ab, úuchik u ts’a’abal ka’ap’éel táayeres beeta’ab, jump’éele’ tu kúuchil Cabildo yéetel u jeele’ tu kaajil Cobá.
En español: Otorgan descuento a productores de Tulum para registrar su marca ante el IMPI
Tu tsikbaltaje’, máax u k’áat u yoks u ju’uno’obe’, wa u yojéeltiko’ob uláak’ ba’alo’ob yóok’lal le nu’ukbesaja’, ku béeytal u túuxtik ts’íib te’ela’: [email protected] wa u túuxtik WhatsApp 984 212 2583.
“Le beetike’, u mola’ayil IMPIe’ tu ya’alaj: Tulume’ taak meyaj, ts’o’oke’ taak xan u beetik ba’al je’el bix jets’a’anilo’, le beetik k’a’anan u ts’íibta’al maarkáas tu táan máax chíimpoltik, le óok’lal beeta’ab u ka’atéenil le nu’ukbesaja’, ts’o’oke’ walkila’ táan u je’ebel u prerejistroil”, tu ya’alaj.
Beyxan tu tsikbaltaje’, u beetik máak le rejistroa’ uts u taal tumen ku ts’áaj u páajtalil u yantal uláak’ ba’alo’ob ti’ máax ti’alintik, ts’o’oke’ tumen ku táakmuk’ta’al tumen IMPI. Tu ya’alaje’ máax kéen u yóot u beete’, ku yutstal u túuxtik u ju’uno’ob, ti’al beyo’ u p’áatal de legal ba’ax ku meyajta’al, yéetel ka p’áatak chéen u ti’al u loogoil yéetel ba’ax ku beetiko’ob.
“Yaan k’iin ku yúuchule’, ku k’ubéenta’al ka beeta’al u disenyoil yéetel u maarkail mola’ay wa meyaj, ba’ale’ ku taal u ts’aej yaanal tu’ux ch’a’abij, wa ma’e’ yaan jump’éel yáax beeta’an jach óoli’ beyo’, le beetik IMPIe’ leti’e’ máax jets’ik yéetel táakmuk’tik maarkas yéetel diseenyi, ts’o’oke’ ku k’ubik tak ju’un a’alik a ti’al”; tu ya’alaj Gómez Soberano.
Ti’al u beeta’ale’ k’a’abéet u chu’upul jump’éel formatóo ti’al u káajsa’al.
Xak'alutskíinsa'an tumen: Sasil Sánchez Chan
