U jala’achil u péetlu’umil Quintana Roo, ikil táan u meyaj u mola’ayil Secretaría de Desarrollo Económico (Sede), yaan u múul beetik yéetel Banca de Desarrollo Nacional Financiera (Nafin) noj meyaj ku k’aaba’tik Tercera Jornada del Programa de Capacitación en Gestión de Negocios e Inclusión Financiera para Hablantes de Lenguas Originarias, tu kajailo’ob Kopchen, Tihosuco yéetel Chumpón, méek’a’ano’ob tumen u noj kaajil Felipe Carrillo Puerto.
“Ichil ba’ax táaka’an tu mokt’aanil Nuevo Acuerdo por el Bienestar y Desarrollo de Quintana Roo, jets’a’ab ka yanak u beeta’al meyajo’ob ti’al u p’íitkunsa’al xma’ keetil kuxtal, le beetik jala’ache’ táan u ts’áak u yóol u meyajt nu’ukbesajo’ob tumen jala’ach, ts’o’oke’ ti’al u béeytale’ yaan u káajal meyaj yiknal maaya kaajo’ob”, a’alab ti’ k’a’aytajil ts’íib.
En español: Capacitarán a comunidades mayas en gestión de negocios e inclusión financiera
Beey túuno’, kaambal ku tukulta’al u ts’a’abale’ u ti’al máaxo’ob t’anik máasewal t’aano’ob, ti’al u kaniko’ob bix u beeta’al jestion, beyxan bix u na’ata’al finansáas, ti’al beyo’ u káajal u nu’ukta’al ba’ax yaan ti’ máak. Ts’o’okole’ yaan xan u ts’a’abal k’ajóoltbil jayp’éel tuukul meyajo’ob ti’al u káajsa’al koonol ti’ Internet yéetel ti’al xan u k’a’amal bo’olo’ob de beey xano’, le je’ela’ tu beeta’al tumen beyo’ táan xan u ts’aatáanta’al ba’ax u ya’almaj kaaj k’a’abéet ti’, ti’al u mu’uk’anchajal u náajalo’ob yéetel ti’al ka xáanak.
Ti’ kaambale’ jóok’sa’an kamp’éel noj tuukulo’ob: emprendimiento, atención al cliente, u ya’abtal koonol yéetel u nu’ukta’al taak’in ku meyaj ti’ le mola’ayo’. U k’iinil u beeta’ale’ beey p’aatala’: Kopchen, 15 yéetel 16 ti’ noviembre, tu taanaj Rosalinda Cahuich; Tihosucoe’ 21 yéetel 22 ti’ noviembre, tu ejidal najil le kaajo’; yéetel Chumpóne’, tu k’iinil 23 yéetel 24 de noviembre, tu ejidal najil le kaajo’.
Xak'alutskíinsa'an tumen: Sasil Sánchez Chan
