Nu’ukul k’ajóolta’an beey taxi volador ts’o’ok u xáantal u jach jaajtal, ba’ale’ yaan u káajal u yila’al tu ja’abil 2025, yáax tu lu’umil Estados Unidos yéetel tu jo’oloje’ Emiratos Árabes Unidos beyxan India, j-a’alab tumen Billy Nolen, máax jo’olbesik u jaats meyajil kanan ichil Archer Aviation.
“Le ba’ax ku tukulta’al jach náach k’iin ba’ale’, ta’aytak u súutul jaajil”, tu ya’alaj Billy Nolen tu kúuchil Salón Aeronáutico, ti’ u noj kaajil Dubai.
En español: Taxis voladores llegarán al mercado a partir de 2025
Táan u páa’ta’al ka éejenta’ak tumen Administración Federal de Aviación de Estados Unidos, tu ja’abil 2025e’, nu’ukul k’aaba’inta’an Midnight, meyajta’an tumen Archer Aviation, jump’éel eleektrikóo péepen k’áak’ ti’al biinsa’al kantúul máaki’, ts’o’oke’ toj u jáayal yéetel u líik’il.
Táan u tukulta’ale’ ka káajak u xik’nal tu lu’umil Emiratos tu ja’abil 2026. "Táan kpáa’tik ka ya’abak máax k’a’abéetkunsik” tu ya’alaj Nikhil Goel, máax jo’olbesik u jaats meyajil Archer.
Ka’alikile’ yaan xan u káajal xik’náal tu kaajil Nueva Delhi, Mumbai yéetel Bangalore. U na’akal máake’, ku tukulta’al yaan u tojoltik ichil 4 yéetel 5 doolarées yóok’lal lalaj juntúul máak yéetel yóok’lal kiloometróo kéen u yáalka’abtej.
Xak'alutskíinsa'an tumen: Sasil Sánchez Chan
