Ti’ le beyka’aj k’iino’ob ts’o’ok u yáalka’ab ti’ le ja’aba’, u mola’ayil Secretaría de Salud ti’ u péetlu’umil Chihuahuae’ ts’o’ok u ts’áak ojéeltbile’, yaan 67 mejen neene’ob yéetel paalal ma’ u chuk jo’op’éel u ja’abili’ tu lu’umil Sierra Tarahumara, ma’ utsil tséentano’obi’. Ti’ ele je’elo’obo’, 16 ts’o’ok u kíimilo’ob tumen yéetel waktúule’ oksa’an tu najil ts’akyaj, beey úuchik u ts’a’abal k’ajóoltbil tumen Gilberto Baeza Mendoza, máax jo’olbesik le mola’ayo’.
En español: Han muerto por desnutrición 16 niños y niñas tarahumaras en lo que va de 2023
Ti’ k’a’aytajil tsikbal beeta’ab te’e k’iino’oba’, tu tsolaj ka’atúul ti’ le waktúul paalal oksa’an tu najil ts’akyaje’, k’ucho’ob tumen jach talam yaniko’ob ikil ma’ tu tséentalo’ob tu beel, ts’o’oke’ u kaajalo’obe’ Guadalupe yéetel Calvo; walkila’ táan u chan ch’a’ak u yóolo’ob tu najil ts’akyaj le kaajo’, ts’o’oke’ uláak’ kantúulo’obe’ oksa’an Hospital Infantil de Especialidades tu káapitalil le noj lu’umo’, ba’ale’ u kaajal paalale’ u máasewal kaajilo’ob Guachochi yéetel de Témoris, tu méek’tankaajil Urique.
Beyxan tu ya’alaje’, u 33 por sientoil le kaasoso’ ti’ yanchajo’ob Guadalupe yéetel Calvoe’; 50 por sientoe’, Guachochi; yéetel 17 por sientoe’, Témoris.
Tu ya’alaje’ ti’ le 67 paalal ma’ t’a’ajtako’obi’ (waktúul oksa’an ti’ najil ts’akyaj, yéetel uláak’ 45 táan u chan ch’a’ak u yóolo’obe’) béeychaj u yila’alo’ob ikil tu beeta’al u nu’ukbesajil Juntos por la Salud de Mujeres Embarazadas, Niñas y Niños Menores de seis años.
Xak'alutskíinsa'an tumen: Sasil Sánchez Chan
