U mola’ayil Oxxoe’ tu ts’áaj k’ajóoltbile’ bejla’e’ ku béeytal u jóok’sa’al taak’in yéetel u táarjetasil deebitóo bulk’iin yéetel buláak’ab.
Ichil baankóos táaka’ane’ ti’ yaan BBVA, Santander, BanCoppel, Banco Azteca, Citibanamex, Banorte, HSBC, Scotiabank, Banjercito, BanRegio, Afirme, Invex, Consubanco, Caja SMG yéetel Caja Morelia Valladolid, beyxan le ku k’a’abéetkunsiko’ob Spine’ yaan u béeytal u jóok’siko’ob taak’in lalaj k’iin, ti’ je’el máakalmáak ti’ le 21 mil u p’éel u kúuchilo’ob koonol Ooxo yaan ichil tuláakal u noj lu’umil México.
U ya’abil taak’in ku béeytal u jóok’sa’ale’, 2 mil pesos ti’ jump’éel transaaxion ts’o’okole’ ma’ k’a’abéet u beeta’al mix jump’éel maan ti’al u béeytal u k’áata’al. Unaj xan u ya’alale’, lalaj baankóo jets’ik bajux u komisyoonil kun k’a’abéetchajal u bo’ota’al.
En español: Ya puedes realizar retiros de efectivo las 24 horas del día en Oxxo: Aquí los detalles
“To’one’ táan k-kaxtik ba’ax ku béeytal kbeetik ti’al ma’ u talamtal u kuxtal máaxo’ob ku taal maan ti’ k-kúuchilo’obi’, ti’al beyo’ u séebkunsa’al ba’al ti’ ba’ax yaan u yil yéetel u jóok’sa’al taak’in”, tu ya’alaj Santiago Rivera, máax jo’olbesik u meyajil serbiisyóos Oxxo.
Ichil ba’ax a’alab tumen Comisión Nacional Bancaria y de Valores (CNBV), Oxxoe’ leti’e’ kóoresponsaal maas nojoch yaan tu noj lu’umil México.
Tu ts’ook u ja’abil 2022e’, Oxxoe’ tu táakbesaj meyaj 23 mil 667 kúuchilo’ob tu’ux ku béeytal u beeta’al jayp’éel ba’alo’ob yaan ba’al u yil yéetel baankóos, ts’o’oke’ lelo’ ku ye’esik kex u 47 por sientoil tuláakal kóorresponsales yaan te’e noj lu’umilo’.
Beey túuno’, ts’o’ok u chíikpajal bix úuchik u nonojchajal u meyaj Oxxo: tu ja’abil 2018 yaan ka’ach 19 mil 551 tu’ux ku ts’aatáanta’al máak; ti’al 2019e’ k’uch tak 20 mil 962; yéetel ti’al 2020e’ jnáak tak 21 mil 590 yéetel 2021e’ k’uch tak 22 mil 522.
Lelo’ ku ye’esike’, ichil 2018 yéetel 2022e’, ya’abchaj 21 por siento u meyajilo’ob ti’al u beeta’al je’el ba’axak operasyoonil banko te’elo’.
Xak'alutskíinsa'an tumen: Sasil Sánchez Chan
