Ikil táan u beeta’al nu’ukbesajo’ob ti’al u péektsilta’al yéetel ti’al u mu’uk’ankúunsa’al u kúuchil u jáayal yéetel u líik’il péepen k’áak’e’, te’e ja’aba’ táan u páa’ta’al ka k’uchul maanal 2 miyoonesil máako’ob xíinximbal tak tu kaajil Tulum, beey úuchik u ya’alik Mario Cruz Rodríguez, máax jo’olbesik Consejo de Promoción Turística te’e kaajo’.
Leti’e’ tu ya’alaje’, óol talamchaj ba’al tu ja’abil 2023, ba’ale’ kex beyo’, ti’al u ts’o’okbale’, uts líik’ik, tumen ichil daatos jóok’ ti’ u lu’umil Quintana Rooe’, ti’al u ts’ook k’iinilo’obe’ xoka’ab maanal 20 miyoonesil ajxíinximbalo’ob, ba’ale’ le jkóojo’ob Tulume’ tu chukaj kex jump’éel miyoon 800 mil máako’ob ichil mexikoilo’ob yéetel táanxel kajilo’ob.
Cruz Rodríguez tu ya’alaje’ táan u jach páa’ta’al ka utsak u yáalkab u ja’abil 2024, ba’ale’ ti’al ka béeyake’ k’a’abéet u yantal múul meyaj ichil kaaj, jala’acho’ob yéetel mola’ayo’ob, “ts’o’oke’ jach leti’e’ táan kmeyajtiko’, ti’al u béeytal k-káajsik u tsoolmeyajil 2024”.
En español: Esperan más de 2 millones de visitantes para Tulum este año
Tu tsikbaltaje’, yaan u kaxta’al ka píitmáanak le 2 miyoonesil ajxíinximbalo’obo’ ti’al le ja’ab yaniko’ona’, ts’o’oke’ ikil táan u meyaj Aeropuerto Internacional de Tulum yaan u yáantaj ti’al u béeytal. “Yaan kmúul meyaj ti’al kts’áak k-óol tuláakalo’on ti’ le meyajo’, ti’al kjach k’alik tu beel le ja’aba’”.
Xookil beeta’abe’, tu ya’alaj, ku jéets’el kéen p’áatak wenel juntúul máak te’e kaajo’, ts’o’oke’ ku béeytiko’ob wa ba’ax ti’al u náaysik u yóolo’ob. Beyxan, Cruz Rodrígueze’ tu ya’alaje’ tak u mola’ayil Instituto Nacional de Antropología e Historia (INAH) láayli’ xan tu xokaj maanal 2 miyoonesil máako’ob tu xíimbaltajo’ob u yúuchben kaajil Tulum tu ja’abil 2023.
“Le bix táan u péektsilta’al noj kaaj ichil tuláakal u noj lu’umil México tumen u jala’achil Quintana Roo jach táaj yaan u yáantaj ti’al u béeytal ba’ax k-k’áat ts’o’oke’ táan u bin u xo’okol -je’ex le jóok’sa’ab- tumen INAH”, tu ts’ook a’alaj.
Xak'alutskíinsa'an tumen: Sasil Sánchez Chan
