Máax bíin u k’áat u kan wa u k’ajóolta’ab uláak’ ba’alo’ob yóok’lal janalo’ob ku beeta’al tu noj lu’umil Méxicoe’, yaan ti’ob tak tu k’iinil 23 ti’ enero ti’al u táakapajlo’ob ti’ jump’éel noj kaambal tukulta’an u beeta’al ti’ Internet, tumen u mola’ayil Instituto Nacional de Antropología e Historia (INAH).
Xookile’ ku k’aaba’tik Cocinas y cultura alimentaria en México, ts’o’oke’ yaan u ye’esa’al tumen jumúuch’ máaxo’ob ku meyaj Escuela Nacional de Antropología e Historia (ENAH) jo’olbesa’an tumen Miriam Manrique Domínguez yéetel Catherine Good Eshelman.
Kaambal kun beetbil ti’ Internete’ jóok’sa’an óox jaats ti’: Cocinas milenarias y creatividad cultural; Diferentes enfoques sobre la comida; yéetel Comida y creatividad cultural en la modernidad.
En español: Convoca el INAH al diplomado ‘Cocinas y cultura alimentaria en México’
Xookile’ yaan u ts’áak u páajtalil u xak’alta’al bix u yúuchul janal ti’ mesoamericanail lu’um yéetel bix úuchik u xa’ak’tikubáajo’ob úucben miatsilo’ob te’e kaajo’obo’. Beyxan, yaan u yantal u súutukil u tsikkbalta’al jejeláas ba’alo’ob kéen jo’op’ok u beeta’al wa u jaanta’al ba’ax ku cha’akal ti’al jaantbil.
U tuukulile’, ka béeyak u pakta’al janal yéetel u yichil áantropolojyáa, tu’ux xan ka xak’alta’ak u jejeláasil bix u beeta’al janalo’ob México.
Ku béeytalnu táakpajal xoknáalo’ob yéetel máaxo’ob u ts’o’oksmajo’ob u xookil áantropolojyáa, áarkeolojyáa wa etnolojyáa, beyxan nutriologóos, biologóos, periodistáas, cheefo’ob, íistoryadorées, ichil uláak’o’ob.
Yaan u tojoltik 6 mil pesos u xookil, yéetel yaan u káajal tu k’iinil 6 ti’ marzo, ti’alk u taal u ts’o’okol tak 11 ti’ septiembre. Yaan u ts’a’abal tu k’iinilo’ob miércoles ichil las 10:30 ja’atskab k’iinil tak láas 2:30 u taal u chíinil k’iin.
Ti’al u yojéelta’al uláak’ ba’ale’ ku béeytal u xak’alata’al u kúuchil Facebook Diplomado Cocinas y Cultura Alimentaria de México, wa u túuxta’al ts’íib te’ela’: [email protected].
Xak'alutskíinsa'an tumen: Sasil Sánchez Chan
