Ikil u kaxta’al bix je’el u páajtal u ka’a k’a’abéetkunsa’al u nej chama, wa koliiyáas, u mola’ayil Universidad Autónoma de Yucatán (UADY) ku beetik páayt’aan ti’ táankelemo’ob, ti’al u táakpajalo’ob ti’ u meyajil “Colillarte”.
Ti’ tsikbal beeta’abe’, Nahomi Trejo Várguez, máax p’aatal tu táan Programa Institucional Espacio 100% Libre de Humo de Tabaco y Emisiones, tu ya’alaje’ le je’ela’, meyaj péektsilta’an tumen jits’at, artista plástico, Jonathan Zúñiga García, tu’ux táan u kaxta’al ka chan éemek le beyka’aj ba’al ku k’askúunta’al ti’ yóok’ol kaab, kéen pu’uluk u nej chaamal, le beetike’ táan u k’áata’al ka ka’a k’a’abéetkunsa’ak u nej chaamal ba’ale’ yéetel its’at, wa aartée.
“Leti’e’ tu beetaj jump’éel meyaj ti’al u máan u monla’ant u nej chaamal pula’antak jáal ja’. Ka’aj ts’o’oke’ tu ka’a k’a’abéetkunsaj ti’al u beetik boono’ob yéetel u estiloil huichol tu’ux ku chíikbesa’al ba’alche’ob”, tu tsolaj.
En español: Yucatán: Invitan a jóvenes a elaborar arte huichol con colillas de cigarros
Le beetike’, tu k’a’ajsaj Noj Najil xooke’ ts’o’ok u ka’a beetik meyaj, tumen ts’o’okili’ u yáax beeta’al Colillatón, tu ja’abil 2023, je’el bix xan Playatón úuchik u múul meyajta’al yéetel Voluntariado UADY beyxan Secretaría de Desarrollo Sustentable del Estado; ts’o’oke’ tu ya’alaje’, bul ja’ab u mo’olol u noj chaamal ti’ paarkées yéetel uláak’ kúuchilo’ob.
Beey túuno’, wa’alkila’, je’ek’a’ab payt’aan ti’al u yokol máak ti’ le ketlama’, yéetel u ts’ook k’iinil u táakpajal máake’ 9 ti’ febrero. Ti’al u ts’íibtik u k’aaba’ máax u k’áat okole’, unaj u yokol tu pláataformail Forms, yéetel k’a’abéet u beeta’al jump’éel ts’íib tu’ux ka tso’olok ba’axten u k’áat okol máaki’.
Óox jaats jóok’sa’an ti’ le meyaja’: yáaxe’, jump’éel táayer tu k’iinil 17 ti’ febrero; uláak’e’ 9 ti’ marzo, uláak’ táayer ti’al u beeta’al kreaasyóon; yéetel u ts’ooke’ 31 ti’ mayo, Día Mundial Sin Tabaco, tu’ux kun e’esabil meyajo’ob kun beetbili’.
Xak'alutskíinsa'an tumen: Sasil Sánchez Chan
