Ku tukulta’ale’, mejen díinosaurio’ob jaantik óoli’ tuláakal ba’al, beyxan le ku jaantiko’ob ka’ach chéen mejen ik’elo’obe’, tu k’a’abéetkunsaj u xiik’ yéetel u k’u’uk’melo’ob ti’al u ja’ak’sik u yóol ba’alche’ob ti’al u béeytal u chukiko’ob, beey jts’a’ab k’ajóoltbil ti’ xaak’al jts’a’ab k’ajóoltbil tu pikil ju’unil Scientific Reports.
Kex tumen ts’o’ok u kaxta’al u reestosil jejeláas díinosaurio’ob yanchaj u k’u’uk’melo’obe’, chéen kaxta’an yaan ka’ach ti’ le jatsa’ano’ob beey Pennaraptoran, ojéela’an yanchaj k’u’uk’melo’ob k’ajóolta’an beey pennáceas, leti’e’ k’a’abéet u yantal ti’al u béeytal u xik’nalo’ob ka’achij.
En español: Pequeños dinosaurios emplumados usaron alas para asustar y cazar presas
Jinseok Park, Hyungpil Moon, Yuong-Nam Lee, Sang-im Lee, Piotr Jablonski yéetel u múuch’ meyaje’, táan u tukultiko’obe’, ba’ax k’ajóolta’an beey protoalase’ míin k’a’abéetkusa’ab ti’al u kaxtik u yo’och ba’alche’, tumen ts’o’ok u yáax ila’al beey u beeta’al ka’ach tumen u jejeláasil ba’alche’ob jaantik mejen ik’elo’ob.
Beey túuno’, ojéela’an ba’alche’obe’ ku k’a’abéetkunsiko’ob ka’ach u boonil u k’u’uk’melo’ob yaan tu xiik’o’ob yéetel tu nejo’obe’ ti’al u ja’ak’sik u yóol le ba’ax ken u chuko’obo’, tumen beyo’ ku jóok’siko’ob ka’ach te’e tu’ux ku ta’akikubáajo’ob ti’al u beetiko’ob u yáalkab, tumen beyo’, ku páajtal ka’ach u ch’a’apachtiko’ob tak kéen u chuko’ob.
Xak'alutskíinsa'an tumen: Sasil Sánchez Chan
