U mola’ayil Instituto Yucateco de Emprendedores (Iyem) tu ts’áaj k’ajóoltbil u buluktéenil u beeta’al u páayt’aanil chuuy Addy Rosa Cuaik, ti’al u péektsilta’al ka beeta’ak meyajo’ob úuch jo’op’ok u beeta’al, beyxan ti’al u yantal uláak’ túumben ba’alo’ob tu’ux ka chíikpajak chíikulalo’ob ti’al le lu’uam’.
Antonio González Blanco máax jo’olbesik Iyeme’ tu ya’alaj u mola’ayil Fomento de las Artesanías (Fonart) tu éejentaj ka yanak kex jump’éel miyoon de pesos ti’al u lu’umil Yucatán, ti’al u béeytal u ts’a’abal meyaj kamp’éel nu’ukbesajo’ob. Leti’ le je’elo’oba’: ti’al u táakmuk’ta’al u meyaj 50 áartesanos, ti’al u ma’anal tsalam, k’óopte’, beelsíinanche’, áak’, piits’, nook’, k’éewel, ichil uláak’ ba’alo’ob, tu’ux yaan u kaxta’al u táakbesa’al máak ti’ u kaajil Jo’,
Xocchel, Tekit, Timun yéetel Saki’. Uláak’ jump’éel nu’ukbesaje’, leti’e’ Proyecto integral, ti’al u mu’uk’ankúunsa’al bej ti’al u yutsil beeta’al ts’o’oksa’al u beeta’al yéetel ti’al u ko’onol nu’ukulo’ob póola’an ti’ che’, tu kaajil Saki’.
En español: Yucatán: Convocan a Concurso Estatal de Bordado ‘Addy Rosa Cuaik 2024’
Beyxan, tukulta’al u ts’a’abal jo’op’éel táayero’ob tu kaajil Tekax ti’al u líiksa’al Corredor Artesanal te’elo’. Yéetel u ts’ook nu’ukbesaje’, ti’al Apoyo para la Salud Ocupacional, tu’ux kun táakbesbil 45 máako’ob ti’ u kaajil Dzityá yéetel Saki’.
Beey túuno’, taak’in je’elo’, ku núupul yéetel le 59 miyoonesil pesos jatsa’an tumen Iyem te’e ja’aba’, ti’al u mu’uk’ankúunsa’al u meyaj máako’ob te’e lu’umo’.
Máax jo’olbesik Desarrollo Artesanal del Instituto Yucateco de Emprendedores, Paulina Viana Gómez, tu ya’alaj ti’ ketlame’ ku béeytal u táakpajal je’el máaxak áartesano ti’ u lu’umil Yucatán, ts’o’ok 18 u ja’abil. U k’a’ananile’ u táakpajal máak ku meyajtik jejeláas nu’ukulo’ob yéetel u k’abo’ob.
Jóok’sa’al jayp’éel jaatsilo’ob je’el bix: xokbil chuuy; u chuuyil xmanikte’; u chuuyil xmolmis; u chuuyil k’ab; chuuy ti maakíina’, (deshilado, calado beyxan rejilla); beeyxan yaan u ch’a’achibta’al u k’aaba’ xchuuyo’ob ma’ u chuk 20 u ja’abilo’obi’.
Náajal ku yantale’, yáax óoxp’éel kúuchilo’ob, ti’ lalaj jaatse’, yaan u k’amik 8 mil pesos; u ka’a kúuchile’, 5 mil yéetel u yóox kúuchile’ 3 mil pesos.
Xak'alutskíinsa'an tumen: Sasil Sánchez Chan
