Ichil meyajo’ob táan u beeta’al ti’al u k’iimbesa’al 102 ja’abo’ob yanak u noj najil xook Universidad Autónoma de Yucatán (UADY), yaan u beeta’al keetil áalkab ts’o’ok u suuktal u beeta’al. Lela’ yaan u yúuchul tu k’iinil 25 ti’ febrero, láas 6:30 ja’atskab k’iin.
Máax jo’olbesik Programa Institucional de Cultura Física y Deporte ich UADY (Picfide), Normando Rivas Cantillo, tu ya’alaj te’e ja’aba’ yaan u beeta’al u keetil áalkab 5 yéetel 10 kiloometróos, je’el bix xan u xíimbalil 3 kiloometróos; tuláakal kun chúunul Remate de Paseo de Montejo. Jóok’sa’an u jaatsil xiib yéetel ko’olel: libre, submáster, máster, veteranos, xoknáalo’ob yéetel u ajmeyajilo’ob UADY ti’al u keetil 10 kilometróos; je’el bix xan libree ti’al xiib yéete ko’olel, ti’al le de 5 kiloometróos yéetel le de xíimbaltbilo’.
En español: Convocan a participar en la Carrera de Aniversario de la UADY
Yaan u béeytal u táakpajal tak mil 500 máako’ob, le beetike’ beeta’ab páayt’aan ti’al u séeb ts’íibikt u k’aaba’ le máax u k’áat táakpajali’.
Ku béeytal u yokol máak tu kúuchil Internet vivedeporte.mx; beyxan u túuxta’al whatsapp ti’ Rinho Runner, tu numeroil 999-970-7103, wa u bin máak tu kúuchil Centro Deportivo Universitario, yaan yóok’ol u bejil 410 s/n ichil 28 yéetel 30 tu baantail Colonia Industrial.
Uláak’ tu’ux ku béeytal u beeta’ale’, tu kúuchil koonol Jaguares yaan tu najil xook Campus de Ciencias Sociales, Económico-Administrativas y Humanidades ti’ UADY; Bicycle Mechanic, Botanas la Lupita Mérida-Caucel yéetel Planeta Maratón–Plaza Ateneum.
U ts’ook k’iinik u ts’íibtik máak u k’aaba’e’, 17 ti’ febrero, yéetel 350 pesos u bo’olil; te’elo’ oka’an u yáantajil ts’akyaj wa ka k’a’abéetchajak ka’alikil táan keetil, ja’ yéetel playeráa.
Xak'alutskíinsa'an tumen: Sasil Sánchez Chan
