U jala’achil u noj lu’umil Méxicoe’, Andrés Manuel López Obrador, tu chúunsaj le miércoles máanika’, u kúuchil Gran Museo de Chichén Itzá, ku p’isik kex 2 mil 800 metros kuadrados, tu’ux táakbesa’an maanal mil u p’éel úuchben nu’ukulo’obi’, jayp’éel ti’ le je’elo’obo’ kaxta’ab ka’alikil táan u beeta’al u bejil Tren Maya.
“Leti’e’ yáax kúuchil e’esajil de formal kun yantal Chichén Itzá” tu tsolaj José Osorio León, máax jo’olbesik le úuchben kaajo’.
U mola’ayil Instituto Nacional de Antropología e Historia (INAH) líik’s le kúuchilo’, Jóok’sa’an ukp’éel u jaatsil yéetel naats’ yanik ti’ le úuchben kaajo’, tu ya’alaj Osorio León.
En español: Abre sus puertas el Gran Museo de Chichén Itzá: Conoce los atractivos
“Yaan u ye’esa’al k’a’anan nu’ukulo’ob, je’el bix Chaac Mool, kaxta’ab naats’ ti’ La Plaza de las Mil Columnas, yéetel La Mesa de los Cautivos, úuch kaxta’ak ti’ yáax serieil kaaj k’ajóolt’aan beey Chichén Viejo, je’el bix xan uláak’ maaya nu’ukulo’ob e’esano’ob ka’ach ti’ uláak’ kúuchilo’ob ti’ táanxel lu’umo’ob”, tu ya’alaj.
Máax jo’olbesik INAH, Diego Prieto, tu ya’alaje’ táan u páa’tal u k’uchul, chéen te’e ja’aba’, kex maanal 3 miyoonesil ajxíinximbal máako’ob; kex 8 mil sáansamal.
Xak'alutskíinsa'an tumen: Sasil Sánchez Chan
