Ajxak’al xooko’ob yaan Amazonase’ tu kaxta’ab ichil u k’áaxilo’ob u lu’umil Ecuadore’, uláak’ jump’éel u jejeláasil u asab nojochil kaan yaan yóok’ol kaab; lela’ juntúul nuxi’ ya’ax anakondáa tu jatsubáaj ti’ u láak’o’ob walkil 10 miyoonesil ja’abo’ob, ba’ale’ u wíinkilalo’obe’ óoli’ ma’ jach k’éexek ti’ bix u yila’alo’ob úuch ka’achilo’.
Jump’éel kóom cha’an k’i’itbesa’ab Internete’, ku ye’esik beyka’aj nuuktak le kaano’oba’, tumen te’elo’ ku chíikpajal juntúul ku p’isik kex 6.1 metros u chowakil, ka’alikil jbiologóo holandesil, Freek Vonk, ku báab tu tséel le nuxi’ ba’alo’, yaan kex 200 kilos u aalil.
En español: Descubren en el Amazonas nueva anaconda que es la serpiente más grande del mundo
Ku tukulta’ale’ chéen jump’éel u jejeláasil ya’ax anakonda yaan, Eunectes murinus, ba’ale’ u pikil ju’unil Diversity tu ye’esaj le túumben kaxta’aba’ “u ya’ax anakondail xamane’” yaanal u jejeláasil, Eunectes akiyama.
“Bino’on te’e k’áaxo’, ti’al kxak’altik ba’ax táan u yúuchul yéetel anakondas tumen táan u chíikbesiko’ob bix táan u k’askúunta’al ba’al ikil u wéekel petróleo tu kúuchil Yasuní, Ecuador, tumen ts’o’ok u p’áatal mina’an u p’iis u beta’al”, tu ya’alaj jxak’al xook Bryan G. Fry, máax ku meyaj Universidad de Queensland, yéetel ts’o’ok u máansik óoli’ kex 20 ja’abo’ob tu xak’altik u jejeláasil anakondas kaxta’an Sudamérica.
Xak'alutskíinsa'an tumen: Sasil Sánchez Chan
