Ikil táan u beeta’al u noj k’iimbesajil áanalte’ob tu noj kaajil Jo’e’, u meyaj Lourdes Grobete’ juntúul máax ts’o’ok u máansik jo’op’éel deekadáas tu ch’a’ak oochelo’ob yéetel le yaan u chíimpolta’al meyaj u beetmaj Laboratorio de Teatro Campesino e Indígena, tu’ux u ye’esmaj jejeláas balts’amo’ob tu’ux chíikbesa’an ba’ax suuka’an u beetik kaaj, kuxtal, chíimp’oltalo’ob yéetel its’at ku yantal te’e kaajo’obo’.
Le beetike’, jo’oljeak 10 ti’ marzoe’, tu kúuchil Secretaría de la Cultura y las Artes (Sedeculta) ts’a’aban ichil Feria Internacional de la Lectura Yucatán (Filey) jts’a’ab k’ajóoltbil u áanalte’il Laboratorio de Teatro Campesino e Indígena: Medio Siglo de Historia, meyaj tu’ux kaxta’ab xan ka chíimpolta’al animáas María Alicia Martínez Medrano, máax káajs le múuch’il meyajo’.
En español: Rumbo a la Filey: Reconocen al Laboratorio de Teatro Campesino e Indígena
Matía Aliciae’ u k’áat ka’ach ka náats’ak mejen kaajo’ob náach yano’obe’ ti’al u kaniko’ob uláka’ ba’alo’ob yéetel u ki’iki’ óolta’al balts’am, tu’ux ka chíimpolta’ak yéetel ka táan óolta’ak kaaj.
U múuch’il Laboratorio de Teatro Campesino e Indígena yanchaj tu baantail Cordemex, tu kaajil Jo’, ts’o’oke’ náachchaj Michoacán yéetel Tabasco. Walkila’ láayli’ u meyaj ti’ maaya kaajo’ob.
Áanalte’ beeta’abe’ ku ye’esik bix úuhcik u k’éexel u kuxtal yéetel u k’a’amal tumen maanal 30 mil máako’ob ti’ mejen kaajo’ob tu noj lu’umil México, ts’o’oke’ chíika’an meyaj beeta’an tumen máaxo’ob táaka’ani’.
Xak'alutskíinsa'an tumen: Sasil Sánchez Chan
