Ko’olel ku taalo’ob tu kaajil Tiholop yéetel Yaxuná, tu méek’tankaajil Yaxcabáe’, tu ts’áajo’ob k’ajóoltbil jump’éel áanalte’ ti’al u tsikbalta’al bix u pakta’al ko’olel ich kaaj, yéetel bix chíika’antako’ob ich u kaajlo’ob.
Le beetike’, áanaltee’ k’aaba’inta’ab Tejedores y tejedoras del k´aajláay.
Patrimonio vivo de Yaxuná y Tiholop. Perspectiva de género en la transformación del patrimonio cultural, ti’al u chíibkesa’al jayp’éel tuukulo’ob yóok’lal kaajo’ob; le je’ela’ beeta’ab yéetel chuuyo’ob suuka’an u meyajta’al te’elo’.
En español: Filey: Dialogan sobre la perspectiva de género desde la cosmovisión maya
“Lela’ táan u kaxtik ka yanak tsikbal, ba’ale’ ma’ chéen beyo’. Ti’al u tukulta’al maaya miatsil u jeel ba’alo’ob taalja’an ti’ tuukulo’ob ma’ mootschaja’an tu ch’i’ibal maaya kaaji’, tumen beyo’ yaan u béeytal u jeel tukulta’al ba’ale’ yéetel maaya óol”, tu tsikbaltaj Georgina Rosado.
Yóok’lal le je’ela’, Karen Uc, máax u jóoks’maj u xookil Comunicación Social ti’ noj najil xook UADY, táakpaj xan ti’ le tsikbalo’obo’, tu ya’alaj: “táayere’ ti’al je’el máaxak u k’áat táakpajali’, ts’o’oke’ ku t’anik tsikbal máaxo’ob uts tu yich áantropolojiyáa, ba’ale’ beyxan máaxo’ob u kanmajo’ob uláak’ ba’alo’ob. K’a’anan ma’ u ch’éenel meyaj ti’al u k’éexel ba’al, u p’áatal mantats’ táan kbeetik wa ba’ax. Meyaje’ táan u taal u beeta’al tumen maaya ko’olel, ba’ale’ yaan xan jaytúul xiibo’ob táankelemo’ob, ts’o’oke’ táan u kaxtik tsikbalo’ob yóok’lal jeeneróo, ba’ale’ yéetel maaya tuukul, ti’al u kaxta’al ka kéet yanak kuxtal te’elo’.
Xak'alutskíinsa'an tumen: Sasil Sánchez Chan
