Julioe’ U Winalil Xok tu péetlu’umil Quintana Roo, ts’o’oke’ ti’al u k’iimbesa’ale’ yaan u beeta’al jejeláas meyajo’ob ti’al u péektsilta’al ich kaaj u k’a’ananil u kaláanta’alo’ob.
Le je’ela’ yaan u béeytal ikil u múul yantal meyaj ichil u múuch’kabilo’ob kaaj, jo’olpóopo’ob yéetel kaaj ku yáantaj ti’al u kaláanta’al u kuxtalil k’áak’náab.
K’iimbesaje’ u bolontéenil u beeta’al tumen u múuch’kabil Saving Our Sharks; káaj u beeta’al ikil u k’a’ajsa’al xan U K’iinil u Péektsilta’al Xok ichil tuláakal yóok’ol kaab, lalaj 14 ti’ julio.
En español: Invitan a actividades por el Mes Estatal del Tiburón en Quintana Roo
Le beetik túune’, le winala’, táakbesa’an ichil meyajo’ob yéetel taak’in suuk u beea’al te’el péetlu’umo’ lik’ul u ja’abil 2021, tu’ux ku yáantaj xan Secretaría de Ecología y Medio Ambiente (Sema) ikil u chíikbesik xok beey juntúul ba’alche’ k’a’anan ti’al u kéet yantal kuxtal. Yaan u yantal jejeláasil tsikbalo’ob kun beetbil tumen ajxaak’al xooko’ob yéetel yaan u beeta’al káampanyáas tu’ux kun péektsiltbil kuxtal yaan ich k’áak’náab. Maanal 40 u p’éel meyajo’ob kun beetbil ti’ Internet, ba’ale’ beyxan ti’ jayp’éel kúuchilo’ob.
Jayp’éel múuch’kabilo’ob kun táakpajal te’el k’iimbesaja’ leti’ le je’elo’oba’: Sociedad Mexicana de Peces Cartilaginosos, Cat Sharks de España, Ciencia de Tiburones, Cooperativa Kab Xok, Chooj Ajahuil, Universidad del Caribe, Universidad Autónoma de Quintana Roo, Luis Javier Sandoval Photography, Parley México, Desmitificando Tiburones, Luum Pakul Alternativo, Canoa Maya yéetel Roller Girls Cancún.
Xak'alutskíinsa'an tumen: Sasil Sánchez Chan
