Kex 220 máak jkíim, ts’o’oke’ tak paalal, úuchik u yáalkab luuk’ le lunes máanika’, tu noojolil Etiopía, beey úuchik u ts’a’abal k’ajóoltbil ti’ EFE le martes máanika’ tumen u jo’olpóopilo’ob le kaajo’.
Tak walkila’ ts’o’ok u kaxta’al u wíinkilal 220 máako’ob, ba’ale’ le je’elo’ je’el u ya’abtale’”, a’alab ti’ tumen Mesker Miteku, máax jo’olbesik u kaajil Gofa, tu’ux úuchij.
En español: Al menos 220 muertos, incluidos niños, en deslizamientos de tierra en el sur de Etiopía
Le je’ela’ p’aatal tu noojolil le kaajo’, kex 470 kilometróos náach ti’ u noj kaajil, Adís Abeba. Miteku tu ya’alaj tu káajbale’, ka’aj áalkabnaj le luuk’o’, k’askúunta’ab bolonp’éel najo’ob úuchik u seen k’áaxal ja’ tu yáak’abil domingo tak lunes, le beetike’ yanchaj u péeksa’al kajnáalo’ob, ts’o’oke’ tak ajkanan kaajo’ob ooko’obi’ ti’al u yilko’ob wa je’el u jóok’sa’al máaxo’ob jmu’ukij.
Ba’ale’ ka’ áalkabnaj luuk’ ka’alikil u jóok’sa’al máak ka’achij.
Máax jo’olbesik Comité de Respuesta de Emergencias de la zona de Gofa, Habtamu Fetena, tu ya’alaje’ láayli’ u kaxta’al máaxo’ob saatalo’obi’. Ichil ba’ax a’alab tu pikil ju’unil Addis Standard tumen juntúul máak táan u yáantaj ti’al u kaxta’al máako’obe’, Kasahun Abayneh, ts’o’ok u kaxta’al 10 máako’ob láayli’ kuxa’ano’ob yéetel táan u ts’aatáanta’alo’ob tumen ts’akyaj.
Xak'alutskíinsa'an tumen: Sasil Sánchez Chan
