U yúuchben wooj wíinkilal San Judase’, jch’a’ab Santa Sede ti’al u k’ujsa’al tak tu noj lu’umil México.
U tuukulile’ ka’aj u xíimbalt jayp’éel dioseesis yaan tu noj lu’umil México, beey úuchik u ts’a’abal k’ajóoltbil ti’ katoolikáa k’a’aytajil ts’íib ku k’aaba’tik Desde la fe. Beyxan a’alabe’ úuchben ba’al jatsa’an beey de primer gradóo, u baakel junts’íit u k’ab.
Tsola’abe’ ku ch’a’abal beey jump’éel úuchben wooj wíinkilal de primer gradoe’ u wíinkilal juntúul santóo wa je’el ba’axak u jaatsil u wíinkilal, u ta’anil wa u baakel. Ichil u k’iinil 28 ti’ julio tak 28 ti’ agostoe’, u wooj wíinkilala San Judas Tadeo yaan u p’áatal tu noj lu’umil México “ti’al u kili’ichkúunsa’al wa u ki’iki’ óolta’al tumen máaxo’ob oksaj óoltik”.
En español: Arriba a México, desde el Vaticano, reliquia de San Judas Tadeo: Conoce cuál será su recorrido
Tsikbalta’abe’ ichil 29 tak 31 ti’ julioe’ ti’ kun biinsbil Arquidiócesis Primada de México, tu noj k’íiwikil Catedral Metropolitana yaan tu noj kaajil Ciudad de México; ts’o’oke’ ti’al u k’iinil 1 yéetel 2 ti’ agostoe’ yaan u biinsbil San Hipólito, Ciudad de México; 3 yéetel 4 ti’ agostoe’ tu kúuchil Parroquia de San Judas Tadeo, Cuemanco.
Ti’al u k’iinil 5 ti’ agostoe’, yaan u k’ujsa’al tu najil k’uj Parroquia Purísima Concepción, Tlacopac; 6 ti’ agostoe’ Diócesis de Azcapotzalco, Santuario de San Judas Tadeo, ts’o’oke’ ti’al 7 yéetel 8 ti’ agostoe’ tu kúuchil Arquidiócesis de Tlalnepantla, Parroquia de San Judas Tadeo, Interlomas, Huixquilucan. Tuláakal xíimbal kéen u beete’ yaan u ts’o’okol 28 ti’ agosto.
Xak'alutskíinsa'an tumen: Sasil Sánchez Chan
