Maanal 100 máako’ob sa’at u kuxtal úuchik u níikil luuk’ yóok’olal seten cháak k’áax tu noojolil India, beey chíikpaj ti’ túumben k’a’aytaj jts’a’ab k’ajóoltbil le martes máanika’ tumen u jo’olpóopilo’ob le kaajo’.
U múuch’il áantajo’obe’ béeychaj u yáantiko’ob 250 máako’ob jmu’uk ka’ach tumen le luuk’o’, kex k’as talamchajij tumen láayli’ táan u k’áaxal cháak ts’o’oke’ lelo’ ma’ táan u cha’ak u k’a’abéetkunsa’al u bejilo’ob Wayanad, kaaj tu’ux maas ila’ab u talamil. “Le k’aasil ba’ax j-úucha’ tu kíinsaj 108 máako’ob”, a’alab ti’ k’a’aytajil ts’íib tumen u ministroil Kerala, Pinarayi Vijayan.
En español: Al menos 108 muertos por desprendimientos de tierra en India
Ka’ache’ chéen xoka’an 93 kimeno’ob. “Tu kúuchilo’ob ts’akyaje’ táan u ts’aatáanta’al 128 máako’ob (...) Jump’éel ti’ u jach k’aasil ba’alo’ob ucha’an ti’ knoj lu’um”, tu ya’alaj. Oochelo’ob jts’a’ab k’ajóoltbil tumen Fuerza Nacional de Respuesta ante Desastres ku chíikbesik áantaj máako’ob ka’alikil u kaxtiko’ob wa yaan máax láayli’ kuxa’an tu yáam le luuk’o’o.
Ejércitoe’ tu k’a’aytaj maanal 200 u túul ajk’atuno’ob táan u meyajo’ob te’elo’, ti’al u béeytal u yáanta’al máak. Ichil uláak’ ba’ax a’alab tumen u pikil ju’unil The Hindu, maanal 250 máako’ob béeychaj u jóok’sa’al ichil le luuk’o’.
Xak'alutskíinsa'an tumen: Sasil Sánchez Chan
