U mola’ayil toj óolal kaaj tu lu’umil Áfricae’ tu jets’aj le martes máanika’ yaan emergencia continental yóok’olal mpox (k’oja’an k’ajóolta’an ka’ach beey viruela del mono), ts’o’oke’ k’a’ayta’abe’ ti’ le p’is k’iinil ku taalo’obo’ yaan u ts’a’abal k’a’ajóoltbil xan jump’éel u nu’ukil meyaj ti’al u ts’aatáanta’al ba’ax ku yúuchul “Bejla’e’ kjets’ik yaan sajbe’entsil ti’al u toj óolal kaaj ichil le continenteo’ ti’al beyo’ u yantal u séeba’an péek kmola’ayo’ob, beyxan u yantal k-óol tuláakalo’on yéetel u k’a’abéetkunsa’al ba’ax yaan to’on ti’al u séeb beeta’al ba’al tu yóok’olal”, tu ya’alaj máax jo’olbesik Centros para el Control y Prevención de Enfermedades de África (CDC de África), Jean Kaseya, ti’ jump’éel k’a’aytajil tsikbal.
En español: Organismo de salud pública de África declara la emergencia continental por mpox
Kaseyae’ tu xchukul t’antaj noj lu’umo’ob táaka’an ichil Unión Africana, mola’ay tu’ux jok’a’an CDC ti’ u lu’umil África, ti’al “ka séeb éejenta’ak u xchukul meyajil u ts’aatáanta’al mpox, tumen jump’éel ba’al k’a’anan ti’al u kaláanta’al kaaj, yéetel ti’al u séeb péek kaaj ti’al ma’ u sa’atal kuxtalo’ob”.
Xak'alutskíinsa'an tumen: Sasil Sánchez Chan
