U k’a’amkach cháakil Ernestoe’ jsúut le miércoles máanika’ chak ik’al tu jo’oloj u seen beet u k’áaxal cháak, yéetel u p’atik maanal 600 mil máako’ob xma’ sáasil tu noj lu’umil Puerto Rico.
Tu taal u píik’il ka’aj máan cháak tu xaman-lak’inil le caribeñail peteno’, ts’o’oke’ k’a’ayta’abe’ jsu’ut chak ik’al categoría 1 -ichil u tsoolil ku k’uchul tak 5- yéetel u k’a’amil u jaats’ u yiik’ale’ k’ucha’an tak 120 kiloometróos por ooráa, a’alab tumen estadunidenseil kúuchil xak’altik chak ik’alo’ob (NHC) ti’ u ts’ook k’a’aytajil ts’íib tu beetaj.
En español: 'Ernesto' se convierte en huracán tras azotar el noreste del Caribe y dejar sin electricidad a la región
Ichil ba’ax tukulta’abe’, Ernestoe’ je’el u k’uchul tak categoría 3 te’el ka’ap’éel k’iino’ob ku taala’, ka’alikil u máan yóok’ol Atlántico ti’al u k’uchul te’el xamano’.
Le viernes wa sábado ku taala’ yaan u náats’al ti’ británicoil petenil Bermudas, a’alab tumen NHC. Ti’ jayp’éel u baantailo’ob yaan tu lak’inil Puerto Ricoe’, chak ik’ale’ tu p’ataj búulkabil yéetel u taamil 243 mm ti’ le ts’ook 24 ooraso’, je’el bix a’al a’alab tumen u servicioil Estados Unidos. U ja’il Río Canóvanas, tu xaman-lak’inil le peteno’, tuulnaj úuchik u seen báanal ja’i’.
Yanchaj kex 638 mil máako’ob xma’ sáasil tu lu’umil Puerto Rico, a’ala’ab tumen Luma Energy, mola’ay beetik yéetel k’i’itbesik sáasil te’el peteno’, U muuk’il u meyaj sáasil te’el puertoricoil lu’umo’ manta’ts ku bin yéetel ku suut úuchik u máan chak ik’al María, catergoría 4, tu jach xe’ek’taj ba’al te’elo’ tu ja’abil 2017.
Kex tumen u nooyil le chak ik’alo’ tu bin u náachtale’, Islas Vírgenes yéetel Puerto Rico láayli’ sajbe’entsil yaniko’ob yóok’olal búulkabil je’el u yantale’, beyxan tumen je’el u yáalkab luuk’e’.
Xak'alutskíinsa'an tumen: Sasil Sánchez Chan
