Tu noj lu’umil México, 36.3 por sientoil kaaje’ kuxa’an ich óotsilil, lela’ u k’áat u ya’alej kex 46.8 myoonesil máako’ob, tu ya’alaj José Nabor Cruz Marcelo, u meyajnáalil Consejo Nacional de Evaluación de la Política de Desarrollo Social (Coneval).
Úuchik u ts’a’abal k’ajóoltbil u tsoolmeyajil Evaluación de la Política de Desarrollo Social (IEPDS) 2024, Nabor tu ya’alaje’ u 29.3 por sientoil kaaj, lela’ 37.7 miyoonesil máako’obe’ kuxa’an ich pobreza moderada yéetel 7.1 por sientoil (9.1 miyoonesil máako’ob) kuxa’an ich le k’aaba’inta’an beey pobreza extrema.
En español: En pobreza, 36.3 por ciento de la población, informa secretario de Coneval
Nabor tu tsolaje’ le ba’ax jóok’ ich Informee’ táakbesa’ab tak u ja’abil 2022, tumen ch’a’aban u datosil Encuesta Nacional de Ingresos y Gastos de los Hogares.
Le ba’ax ku yila’al ku binetik ti’ kaaje’ leti’e’ mina’an seguridad social ti’ u 50.2 por sientoil kaaj; mina’an u serviciosil toj óolal ti’ u 39.1 por sientoil kaaj; yéetel uláak’ ba’ale’ leti’e’ kaambalo’, tumen mina’an ti’ 19.4 por sientoil kaaj.
Yóok’olal máaxo’ob ma’ u chuk 18 u ja’abile’, Nabore’ tu ya’alaje’ u 45’.8 por sientoile’ kuxa’an ich óotsilil, uláak’ 9.9 por sientoile’ kuxa’an ich pobreza extrema yéetel 35.9 por sientoile’ ich pobreza moderada.
Xak'alutskíinsa'an tumen: Sasil Sánchez Chan
