Tu jo’oloj bulukp’éel k’iino’ob táan u báaxta’al keetilo’obe’, le domingo máanika’ ts’o’okspaj keetilo’ob yanchaj ich Juegos Paralímpicos tu noj kaajil París tu’ux ila’ane’ u ya’abil medaayas náajalta’ane’ China ti’alintik, tak junchan súutuk antes u k’a’alal le noj keetilo’, tu’ux u’uya’ab u elektronikáa paaxil beeta’an tu lu’umil Francia.
Iraníil Ahmad Aminzadeh, tu keetil parahalterofiliae’, tu béeykunsaj u ts’ook oroil París 2024.
En español: México logra 17 medallas en los Juegos Paralímpicos de París
U noj lu’umil Chinae’, desde u keetilo’ob Atenas 2004 ka’aj jo’op’ u jo’olbesik u yáax kúuchil lu’umo’ob náajaltik medaayáas tumen tu k’amaj 94 oros, 76 platáas yéetel 50 bronces ti’al u taal u ts’áaj tu ts’ooke’ 220 u p’éel medaayáas. Tu paache’ tu yaan le 124 u p’éel medaayáas béeykunsa’ab tumen Reino Unido (49-44-31) yéetel Estados Unidos (36-42-27).
Beey túuno’ Méxicoe’ tu náajaltaj 3 oróos, 6 platáas yéetel 8 bronsées. Tu ts’ook keetilo’ob le domingoa’ jke’et u noj chíimpolalil báasketbol yóok’ol siiyáa de ruedas báaxta’an tumen ko’olel, tu’ux táanilchaj neerlandesilo’ob yóok’ol Estados Unidos (63-49). Beyxan tu ja’atskabil k’iine’ áalkabta’ab maratón, tu’ux k’ama’ab tumen Alberto Sánchez u medaayail plata ti’al España; yéetele’ tu chukaj 40 u p’éelal.
Je’ex úuchik yéetel u ts’ook báaxalil ich Juegos Olímpicos, jtu’up k’áak’ t’aba’an Jardín de Tullerías ti’al u máansa’al ti’ máaxo’ob k’ubéenta’an u ka’ t’abo’ob tu kaajil Los Ángeles ti’al u ja’abil 2028.
Xak'alutskíinsa'an tumen: Sasil Sánchez Chan
