Yucatáne’ ma’ chéen Jo’i’, Yucatáne’ yaanal ba’al. Yéetel le tuukula’, xperiodista Katia Rejóne’ ku páayt’antik máak ti’al u súutukil u xo’okol Tierra de Sol. Crónicas de una región hirviendo, jump’éel áanalte’ tu’ux molts’íibta’an tsikbalo’ob táanxel tu paach le sak kaaje’, tu’ux ku ye’esa’al yaan uláak’ t’aano’ob yéetel meyajo’ob ku beeta’al náach ti’ noj kaaj jo’olbesik Yucatán.
“K’a’abéet u tsikbalta’al Yucatán xma’ Jo’il tumen ti’al u na’ata’al Yucatáne’ jach suuk kyáan ch’a’chibtik Jo’”, ku ya’alik xts’íib.
En español: Katia Rejón presenta: ‘Tierra de Sol’, seis crónicas sobre el territorio en Yucatán
Tierra de Sol ku xíimbaltik u kaajilo’ob Tecoh, Dzilam de Bravo, Oxkutzcab, Hocabá, Sotuta yéetel Chicxulub, wakp’éel ti’ le 106 u p’éel noj kaajo’ob méeka’an tumen Yucatán, tu’ux wíinike’ ku tsikbaltik ba’ax ku yaayantik, ba’ale’ beyxan ba’ax ku alab óoltik, yéetel kex ma’ ojéela’ane’, ku múul meyaj ti’al yéetel uláak’ kaajo’ob te’el noj lu’uma’.
“U tsikbalil baatsilo’ob, tumen yaan máako’ob tin ch’a’achibtaj tu’ux chéen óoxtúulo’ob ti’ jump’éel naj, chiich yéetel u yaabilo’ob; beyxan, u ajk’ajla’ayil le kaajo’, máax ku ch’a’aik oochelo’ob, u láak’ kaja’an naats’ teen kajlaj Chicxulub ba’ale’ bin kajtal tu kaajil Jo’. Yaan uláak’ t’aano’ob unaj u yu’uba’al yéetel lelo’ ku yáantaj ti’al u pakta’al yaanal bixij le jejeláas kaajo’obo’”, tu ya’alaj Rejón máax láayli’ u meyaj La Jornada Maya.
Le sábado 21 ti’ septiembre ku taala’ yaan u ts’a’abal k’ajóoltbil le áanalte’a’, tu kúuchil Local de Chuburná, p’aatal yóok’ol u bejil 16 yéetel 15 tu múuch’kajtalil Chuburná, ts’o’oke’ leti’e’ kéen yáax ts’a’abak k’ajóoltbil u yáax juntéenil u jóok’sa’al le áanalte’o’ ti’ ju’un, tumen ts’o’okili’ u yáax jóok’sa’al u díijitalil tu winalil febrero máaniko’. Ti’al le yáax e’esajila’ jóok’sa’an 500 u p’éel le áanlate’obo’.
Xak'alutskíinsa'an tumen: Sasil Sánchez Chan
