Ka’atúul máako’ob jach u na’atmajo’ob bix u meyaj inteligencia artificial, John Hopfield yéetel Geoffrey Hinton, tu náajaltajo’ob u chíimpolalil Premio Nobel de Física tumen áantajnajo’ob ti’al u yantal jach ba’ax k’a’abéet ti’al le k’ajóolta’an beey aprendizaje automático, jump’éel ba’al táan u jach k’exik bix u yúuchul meyaj yéetel bix kuxliko’on, ba’ale’ beyxan ku beetik u yantal u jeel sajbe’entsil ba’alo’ob ti’al wíinik, tu ya’alaj juntúul ti’ le máako’obo’.
Hilton, máax k’ajóolta’an beey u padrinoil inteligencia artificiale’, juntúul u kajnáalil Canadá yéetel Gran Bretaña ku meyaj tu noj najil xook Universidad de Toronto; Hopfielde’ juntúul estadounidenseil ku meyaj Princeton.
En español: Pioneros en inteligencia artificial ganan el Premio Nobel de Física
“Le ka’atúul máaxo’ob chíimpolta’ab beey Premios Nobel de Física te’el ja’aba’ tu k’a’abéetkunso’ob u ba’alilo’ob fisiikáa ti’al u patjo’oltiko’ob u nu’ukil ti’al u yantal u baseil aprendizaje automático yaan te’el k’iino’oba’”, a’alab tumen u múuch’kabil jets’ik Nobel ti’ k’a’aytajil tsikbal.
Ellen Moons, máax táaka’an ichil u múuch’kabil Nobel de la Real Academia Sueca de Ciencias, tu ya’alaj le ka’atúul máaxo’ob chíimpolta’abe’ “ku k’a’abéetkunsiko’ob k’a’anan tuukulo’ob ichil física estadística ti’al u patjo’oltiko’ob le ku k’aaba’tik redes neuronales artificiales ku meyajo’ob beey ba’alo’ob ku k’a’ajsajo’ob yéetel ku kaambalo’ob, ti’al u kaxtiko’ob patrones ti’ nojoch datos ku jóok’sa’al”.
Xak'alutskíinsa'an tumen: Sasil Sánchez Chan
