Le 16 ti’ octubre máanika’, je’eb u joolnajilo’ob Museo de los Ferrocarriles ti’al u xíimbalta’al u k’ajla’ayil chimes k’áak’ yéetel bix máanja’an tu péetlu’umil Yucatán.
Kúuchile’ ti’ yaan Gran Parque de La Plancha. Jo’ jaats jóok’sa’an ti’ -lelo’obo’ ti’ kun p’áatlo’obi’- yéetel yaan uláak’ jump’éel yaan u k’e’exel. Jejeláas ba’al kun u’uybil yéetel kun cha’antbil, je’el bix u xíimbalta’al máak yóok’ol jump’éel lóokomotoráa, ba’ale’ lelo’ béeykunsa’an yéetel u yáantajil jump’éel simuladóor, p’iiskúunsa’ab ti’ jump’éel u kisbuuts’il u biinsa’al máak Mary Lee.
En español: Inauguran el Museo de los Ferrocarriles dentro del Parque de La Plancha, en Mérida: Fotos
U súutukil úuchik u chúunul u je’ebele’, jo’olbesa’ab tumen Patricia Martín Briceño, máax jo’olbesik Secretaría de Cultura y las Artes (Sedeculta). Tu ya’alaje’ kúuchile’ ma’ chéen ku chíimpoltik k-k’ajla’ayili’, tumen ku mu’uk’ankúunsik u miatsil klu’umil.
“K’a’anan súutuk táan u máansik Yucatán, táan Renacimiento Maya, tu’ux ku núupul ba’ax suuka’an yéetel k-kuxtal walkila’. Tren Mayae’ u chíikulal le púut kuxtalo’, ts’o’oke’ le kúuchila’ ku núupul yéetel ba’ax ku tsikbalta’al yóok’olal k-k’ajla’ay yéetel ba’ax táan kbeetik ti’al u paachil k’iin”, tu ya’alaj Martín Briceño.
U kúuchil e’esajile’ yaan u je’ebel martes tak domingo, láas 10 ja’atskab k’iin tak láas 5 u taal u chíinil k’iin. 120 pesos u yokol táanxel kajil máako’ob; 80 ti’al jmexikoilo’ob; 60 pesos ti’al u ajmeyajilo’ob Fuerzas Armadas; 40 pesos ti’al xoknáalo’ob, ajka’ansajo’ob, nojoch máako’ob yéetel yukatanilo’ob. Máaxo’ob ma’ máanja’an 13 u ja’abile’ xma’ bo’olil u yokolo’ob.
Xak'alutskíinsa'an tumen: Sasil Sánchez Chan
