Yóok’olal meyaj u beetmaj ti’al nojba’alkúunsa’al miatsil tu noj lu’umil Yucatán, yéeya’ab María del Socorro Loeza Flores ti’al u k’amik u chíimpolalil Medalla Yucatán ku ts’a’abal tumen u jala’achil noj lu’um, tu yáam u k’aaba’ Secretaría de la Cultura y las Artes (Sedeculta).
Xbeet balts’am yéetel máax péektsiltik maaya t’aane’ yéeya’ab tumen juradóo tu’ux táakpaj Raquel Esther Araujo Madera, Carolina Depetris yéetel Feliciano Sánchez Chan.
Tu jo’oloj xak’alta’ak yéetel tsikbalta’ab máaxo’ob oksa’ab u k’aaba’ ti’al u k’amik chíimpolale’, jets’a’ab láaj chuka’an ba’al ti’ Socorro ti’al u béeytal u k’amik.
En español: Socorro Loeza recibirá la Medalla Yucatán por su aporte en la cultura maya
Leti’e’ síij tu méek’tankaajil Tecoh, tu ts’o’oksaj u xookil Teatro yéetel Maestría en Dirección de Escena tu noj najil xook Universidad de las Artes de Yucatán. Beyxan oka’an Sistema Nacional de Creadores de Arte tu jaatsil Dramaturgia, Literatura en Lenguas Indígenas.
Loeza Florese’ yaan u k’amik chíimpolal le 20 ti’ noviembre ku taala’ yéetel yaan xan u k’u’ubul ti’ 25 mil pesos beyxan jump’éel diplomáa, ts’o’oke’ yaan xan u ts’a’abal ti’ jump’éel medaayáa, tumen leti’e’ u kuxa’an t’aanil maaya miatsil tu noj lu’umil Yucatán, máax xan ku meyajtik balts’am ti’al u mu’uk’ankúusa’al, u chíimpolta’al yéetel u jeel kuxkíinsa’al maaya miatsil.
Xak'alutskíinsa'an tumen: Sasil Sánchez Chan
