Chan muuche’ k’ajóolta’an ich káastelan t’aan beey ranita de árbol amarilla yéetel Dendropsophus microcephalus u sientifikoil k’aaba’. Méek’a’an tumen Hylidae baatsil, ts’o’oke’ le chan ba’alche’a’ ku béeytal u k’exik u boonil de k’iin, yéetel u ka’a k’exik de áak’ab, tu tsolaj José Rogelio Cedeño Vázquez, jxak’al xook tu kúuchil Sistemática y Ecología Acuática tu najil xook El Colegio de la Frontera Sur Unidad Chetumal.
Leti’e’ tu tsolaj u ch’i’ibale’ ti’ yaan ti’ americanoil continente.
En español: Ranita de árbol amarilla, anfibio que cambia de color
Ku béeytal u yila’al tu noojolil Veracruz tak tu xamanil Oaxaca, bruzan tu noojollak’inil México; Guatemala yéetel maas noojol tak Honduras, Nicaragua, Costa Rica yéetel Panamá. Beyxan Colombia, Venezuela, Trinidad y Tobago yéetel tak tu petenil Trinidad, beyxan Brasil.
Chan chichan muuch. U xiibile’ maas chichan ti’ u xch’uupil. Je’el u p’isik tak 27 mms desde tu ni’ tak tu tuchnej; u xch’uupile’ tak 32 mms. Chíika’an leti’e’ chan muucha’ tumen táax u pool yéetel u ni’e’ wóolis ts’o’oke’ kóom. U tu’uk’il u yiche’ túuts’ ts’o’oke’ chilikbal.
Xak'alutskíinsa'an tumen: Sasil Sánchez Chan
