Waxakp’éel u ja’abil Zelmy Domínguez Chan ka’aj utschaj tu yich chuuy. Ti’ tu na’ataje’ uts u yich chuuy ku beeta’al Yucatán, u nook’il yéetel bix nupa’an tu kuxtal wíinik.
Ichil u k’iinil 14 tak 17 ti’ noviembre ti’ le ja’aba’, Zelmye’ béeychaj u táakpajal Original, Encuentro de arte textil mexicano, patjo’oltab tumen Organización de las Naciones Unidas para la Educación, la Ciencia y la Cultura (Unesco) yéetel tumen Secretaría de Cultura ti’ u jala’achil u noj lu’umil México. Te’el múuch’o’ táakpaj uláak’ xchuuyo’ob ti’ uláak’ u péetlu’umkl México, beeta’ab tu kúuchil Los Pinos, Ciudad de México.
Ichil u súutukil kaambal yéetel tsikbal yanchaje’, béeychaj ktukultik, Ichil tuláakal ko’olel bino’one’, leti’e’ chuuy beetik kmúul yantal ti’ le kuxtala’. Chúumuk ba’al ti’al tuláakal máaxo’on kchuuy tu lu’umil México. Tak ilaje’ yaan u jejeláasil puntadasil, nook’o’ob, hilos. Uláak bix u yúuchul chuuy”, tu ya’alaj Domínguez Chan, xchuuy ti’ u kaajil Tekit, úuchik u tsikbal yéetel La Jornada Maya.
En español: Conoce a Zelmy Domínguez, bordadora de Tekit que representó a Yucatán en evento de la Unesco
“Tin paalile’ uts tin wich in wilik u chuuy ka’ach in maama yéetel in chiich, ba’ale’ beey úuchik u káajal u bin in wilik uláak’ u jejeláasil meyajo’ob je’el bix chuuy ti’ kanebáa, u chuuyil maakináa yéetel u maakinail 20U. In k’áat ka’ach in wil bix u meyaj tuláakal le ba’alobo’”, tu ya’alaj.
Walkila’, Domínguez Chane’ ku meyajtik óoxp’éel jejeláas ba’al: u chuuyil k’ab, ti’ maakináa de pedal, yéetel u maakinail 20U, u ts’ooka’ jump’éel ti’ le maas uts tu yich.
In maama ka’ansen, ku ya’alik ka’ach: ‘kex ma’ a meyajtike’ yaan a beetik tumen ba’al kti’al. Juntúul xyucatanil ma’ u yojel chuuye’, ma’ xyucatanili’”, tu ya’alaj Zelmy Domínguez.
Xak'alutskíinsa'an tumen: Sasil Sánchez Chan
