Úuchik u chukik 39 ja’abo’ob chíimpolta’ak Sian Ka’an beey Reserva de la Biosfera, le 21 ti’ eneroa’, jts’a’ab k’ajóoltbil u ye’esajil Donde nace el cielo, santuario de vida, meyaj ku kaxtik noj ba’alkúunsik u k’a’ananil u kuxtal yaan tu baantail maaya lu’um Quintana Roo.
U curaduríaile’ beeta’ab tumen xbeet cha’an Erika López, máax k’ajóolta’an xan beey Erika Zotz, yéetel kaambanaja’an yóok’olal patrimonio natural, cultural beyxan mixto tu noj lu’umil México, máax xan meyajnaj beey curadora yéetel u xjo’olbesajil le e’esajilo’.
Ti’ tsikbal tu beetaje’, Erika Zotze’ tu ya’alaj múul meyaj yanchaj ichil u kúuchil meyaj Reserva de Sian Ka’an yéetel u ayuntamientoil Felipe Carrillo Puerto beyxan Tulume’, jach k’a’anan ti’al u béeytal e’esajil chúun las 4:30 u tala u chíinil k’iin, tu kúuchil Teatro de la Ciudad ti’ u kaajil Felipe Carrillo Puerto yéetel yaan u béeytal u cha’antal tak tu k’iinil 27 ti’ enero.
Tu tsolaj e’esajile’ ku chíikbesik u jejeláasil kuxtal yaan te’el k’áaxo’, je’el bix peteno’ob, ts’ono’oto’ob, chak te’ob, ichil uláak’o’ob; beyxan Sistema Arrecifal Mesoamericano (SAM).
En español: Celebran con exposición el 39 aniversario de Sian Ka’an: Conoce los detalles
Jejeláas kuxtal yaan te’elo’ ku ye’esa’al yéetel u meyaj jch’a’a oochelo’ob yéetel kúuchilo’ob, je’el bix Roberto GJO, Brisa Sánchez, Omar Ortíz, Emiliano Zarazúa, Juanita Poot, u kúuchil Centro Investigador del Sistema Acuífero de Quintana Roo (CINDAQ), u múuch’kabil Oceanus, México Ka’an Tours, Comunidad y Biodiversidad (Cobi), Universidad Autónoma de Quintana Roo, IFAW tu’ux táaka’an Víctor Rosales yéetel El Colegio de la Frontera Sur (Ecosur).
Ti’al u béeytal meyaje’, yanchaj u yáantajil mola’ayo’ob je’el bix Comisión Nacional de Áreas Naturales Protegidas (Conanp), Hola Tulum, Son de México, World Wildlife Fund (WWF), Amigos de Sian Ka’an yéetel Slow Food.
Xak'alutskíinsa'an tumen: Sasil Sánchez Chan
