Ya’abach culiacanilo’obe’ tu k’áatajo’ob ka’aj yanka u tse’elel jmorenail Rubén Rocha Moya beey u jala’achil u lu’umil Sinaloa tumen ma’ táan u tsa’ayal u ts’aatáant ba’ax u noj talamil le noj lu’umo’: sajbe’entsil yaan ti’al kaaj yéetel loobilaj káaj le 9 ti’ septiembre máaniko’, úuchik u káajal ba’atel ichil ka’a jaats ti’ u cártelil Sinaloa; tak walkila’ ts’o’ok u kíimil kex 800 máako’ob tumen, yéetel kex 400 máak saatal, ichil uláak’ ba’alo’ob.
“Jets’ óolal k-k’áat, jets’ óolal k-k’áat”, “jóok’sa’ak Rocha, jóok’sa’ak Rocha”; “Kaaj ts’áak’, kaaj luk’sik”, chéen jayp’éel ti’ le ba’ax ku yawta’al tu bejilo’ob Culiacán, ti’ ba’ax ila’ab beey u jach nojoch xíimbalil beeta’ab te’el k’iino’oba’ te’el kaajo’, tu’ux páayat’anta’ab kajnáalo’ob, je’el bix ti’ yáax xíimbalil beeta’ab le jueves máaniko’.
En español: Vinculan a proceso a el 'Chavo Félix', yerno de 'El Mayo' Zambada
Ya’abach ti’ máaxo’ob táakpaje’ ts’o’ok u máansiko’ob wa ba’ax talamil yóok’olal loobilaj yaan te’el kaajo’, beyxan tumen yaan wa máax láak’ ti’ob saatal, okolta’an, kíinsa’an, wa ts’o’ok u yantal u k’alik kúuchil u koonolo’ob tumen sajbe’entsil ti’al máak u p’áatalo’obi’.
Táakpaj xiibo’ob, ko’olel yéetel paalal, u ya’abile’ sak u nook’o’ob; tu k’áatajo’ob ka xu’ulsak loobilaj je’ik u beel “ba’ateltáambal” ichil u múuch’kabilo’ob Los Chapitos yéetel Los Mayitos, káaj tumen Ismael El Mayo Zambada, máax jo’olbesik u cártelil Sinaloa, jma’ach tumen u jala’achil Estados Unidos, le 25 ti’ julio máaniko’.
Máaxo’ob taakpaje’ tu k’aas óoltajo’ob úuchik u kíinsa’al Alexander, máax chéen 9 ja’abil ka’achij, yéetel Gael, 12 u ja’abil, tumen kíinsa’ab xan u taataob, le 19 ti’ enero máaniko’. “Paalale’, ma’; paalale’ ma’”, k’áata’abij.
Xak'alutskíinsa'an tumen: Sasil Sánchez Chan
