Xk’aay Dorian Woode’, tu ye’esaj tu táan u chuup kúuchil balts’am Teatro Armando Manzanero, u jats’utsil u juum u k’aayo’ob Chavela Vargas, ts’o’oke’ tu ts’áaj u yóol ti’al u beetik u k’a’ajsa’al k’aayo’ob je’el bix Macorina, Se me olvidó otra vez, ichil uláak’o’ob.
Meyaje’ tu k’aaba’intaj Xavela Lux Aeterna: La voz de Chavela Vargas, Te’elo’, Doriane’ chíikpaj yéetel u chak yéetel boox nook’. Ka’alikil u k’aaye’ tu k’a’ajsaj Chavela: “juntúul ko’olel kuxlaj le bix tu tukultaj k’a’abéeto’, ts’o’oke’ tu beetaj ba’ax tu yóotaj”, tu ya’alaj. Yéetel u muuk’il u k’aaye’, tu k’ayaj Paloma Negra, La llorona, No soy de aquí, ni soy de allá beeta’ab tumen Facundo Cabral, ba’ale’ ts’a’aban u ki’il tumen Chavela, beyxan u’uya’ab Gracias a la vida ti’al Mercedes Sosa.
Dorinae’ tu ya’alaj jach jats’uts u yilik mexicoil miatsil, ts’o’oke’ ki’ u yu’ubik u yooxolil yucatanil lu’um. Te’el súutuko’, láak’inta’ab tumen Ensamble de cuerdas ti’ Orquesta Sinfónica de Yucatán, guitarra yéetel batería.
En español: Dorian Wood conmueve al auditorio del Teatro Armando Manzanero, en Mérida
Doriane’ tu ye’esaj xan uláak’ k’aayo’ob leti’ beetmajil. Te’el súutuko’, Doriane’ láak’inta’ab tumen LGBTQ+ wíinik tu kaajil Jo’. T’aanaj ti’al ka yanak yaabilaj yéetel ti’al ka k’a’amako’ob je’ex unaje’, tumen tu ya’alaje’, tuláakal máak trans, tumen mantats’ táan k-k’éexel. Cha’an tu beetaje’, táaka’an ichil u k’iinil Día Internacional de la Visibilidad Trans, ku k’a’ajsa’al bejla’a 31 ti’ marzo.
Cha’ane’ jts’o’ok yéetel u k’aayil Amor eterno, beeta’an tumen Juan Gabriel. Lela’, tu k’ayaj ka’alikil u machmaj juncháach loolo’ob jsi’ib ti’. Wa’alaj máak ti’al u papaxk’a’abta’al. Meyaj ti’al u béeytal cha’ane’ tsikbalta’ab ichil u mola’ayil Secretaría de la Cultura y las Artes de Yucatán, Secretaría de las Juventudes de Yucatán, ich múul meyaj yéetel Orquesta Sinfónica de Yucatán.
Xak'alutskíinsa'an tumen: Sasil Sánchez Chan
