Tak le lunes máaniko’, a’alabe’ tu lu’umil Myanmare’, xoka’an maanal 2 mil kimeno’ob úuchik u péek lu’umi’, beey tu k’a’aytaj jo’olpóopo’ob te’el kaajo’, ts’o’oke’ u tuukulil u kaxta’al uláak’ kuxa’an máak tu yáam le pak’ nikikbalo’obo’, ku bin u p’íitchajal tu jo’oloj máanak óoxp’éel k’iin péeknak lu’um u’uya’ab tak Tailandia, lu’um yaan tu tséel.
Birmanail jo’olpóopo’obe’ tu jets’o’ob jump’éel semana ku yantal luto te’el lu’umo’, ts’o’oke’ chéen chúumuk hastail kun ch’uykíinsbil u banderail “ti’al u chíikbesa’al láak’inaj yóok’olal kuxtalo’ob sa’atij, beyxan yóok’olal le beyka’aj ba’alo’ob k’aschajij”.
En español: Myanmar reporta más de 2 mil 700 muertos en sismo mientras se pierde esperanza de hallar sobrevivientes
Yaan u saajkil ka yanak uláak’ ya’abach kimeno’ob, kex tumen walkila’ ts’o’ok u péeksa’al u yáantajil uláak’ noj lu’umo’ob ti’al u yáanta’al Myanmar, úuchik u yila’al beyka’aj ba’al k’aschajij.
Jumpáay ti’ le 2 mil 56 u túul máak jkíime’, yaan maanal 3 mil 900 u túul máax ti’ob úuch loobilaj, yéetel uláak’ 270 máako’ob láayli’ saatalo’obe’.
“Jach talam yanik ba’al, le beetik talam u tsikbalta’al ba’ax le táan u yúuchulo’”, tu ya’alaj Aung Myint Hussein, máax beetik u administradoril u mezquitail Sajja North.
Ya’abach máake’ láayli’ u wenel yóok’ol bejo’ob, tu maas náachil ku páajtal ti’ kúuchilo’ob sajbe’entsil yanik u níikil. Tu jo’oloj úuchik u yáax tíitikubáaj lu’um le viernes máaniko’, yanchaj uláak’ u yéets’tajil de 6.7 grados u chichil.
U chichil úuchil u péek lu’ume’, leti’e’ maas chich ts’o’ok u yantal ti’ u ts’ook decadasil te’el noj lu’umo’, ts’o’oke’ tu beetaj u yantal saajkil tak mil kms tu bak’pachil epicentro, je’ex tu kaajil Bangkok, tu lu’umil Tailandia, tu’ux jkíim kex 19 máaki’, úuchik u níikil jump’éel torre 30 u t’o’olil ka’achij.
Xak'alutskíinsa'an tumen: Sasil Sánchez Chan
